向錢看

「批評」

好多時都會聽到有人批評時下嘅年輕人，而其實每個年代都會遇到同樣嘅情況。不過新一代真係睇錢睇得比較重，嚟個問題其實嚟自而家嘅社會環境。如果你問大部份嘅年輕人要自己出嚟租層樓住嘅話，我相信好多都會同你講無可能。就算租間套房都起碼要六七千蚊啦，而人工一般都係萬幾蚊個月。再加上向上游嘅機會少，又無前途，又無錢財，咁好自然睇錢做人啦。

「社會」

現今嘅社會好多時係用錢去衡量一個人嘅成功與否，有錢就有地位。就算你係專業人士又點？你搵嘅人工都有個基本上限，更何況大部份嘅年輕人都只係一名普通嘅打工仔而已。究竟而家嘅年輕人覺得要搵幾多錢一個月先至覺得自己成功？大家都年輕過，同自己年紀相若嘅人作比較係好平常嘅事，只不過佢哋仲未明白有時係要有付出先至有回報，而唔係樣樣嘢都係睇搵幾多錢。

「生活」

係香港要有一個優質嘅生活其實真係幾難，所以好多年輕人為咗要搵錢而投身金融同房地產行業。而家當然亦有啲未畢業就已經話要創業。老實講人生係唔係真係淨係得錢嚟樣嘢？有時真係唔好怪啲年輕人，因為係個社會造成，一個極之傾斜嘅社會嘅問題。成日話香港要轉型，要創造更多元嘅工作，但係如果無人肯俾錢投資落去嗰啲行業，其實到最後都係一樣，因為跟本就連基本生活都負擔唔起！

Originally published at Kenneth Kwok (郭嘉俊).