在身旁

「科技」

現今科技發達，幾乎每個人都會有一部智能電話。本來科技嘅原意係令生活更加方便，但係亦因為科技而令人與人嘅關係疏遠。你每日究竟會花幾多時間係部電話到？有時我都覺得好好笑，因為而家真係越嚟越少人會打電話，好多都係用即時通訊軟件溝通。咁電話唔係用嚟打電話，咁其實同一部電腦有乜嘢唔同？過去十年科技嘅改變對大家嘅生活真係好大，但係偏偏自己嘅工作就同科技又關。

「人生」

人生嘅時間真係好短，短到無人信。好多人都會講活在當下，但係乜嘢係活在當下？雖然科技真係令大家嘅生活方便咗，但係隨著時間一分一秒咁過去，其實大家有無忽略咗身邊人呢？小朋友真係大得好快，老人家亦都老得好快。而自從郭大少出世之後，其實用手機嘅時間真係少咗好多，因為要照顧佢係真係無時間理部電話。不過咁亦都好，因為親子嘅時間真係好難得。人生其實仲有好多值得大家去花時間，所以唔好浪費自己嘅時間，多啲陪伴身邊人呀！

「病態」

其實依家有好多人用手機用到一個病態嘅地步。有時行路真係全程可以望住部電話，撞到人都事少，發生意外就無謂啦！最特別嘅係而家啲人真係覺得發咗個訊息俾你就一定睇到。老實講唔係事必睇到，如果真係有急事嘅，點解唔可以打電話？所以依家好多時都會同人講如果搵我你可以留低訊息，但係我未必可以即刻覆，如果有事嘅可以打俾我。如果無人聽可以留低口訊，我收到嘅就一定覆。

Originally published at Kenneth Kwok (郭嘉俊).