城門谷
2 min readFeb 5, 2017
「城門」
城門谷係邊度？上網睇下維基百科，原來城門谷其實係香港嘅一個谷地，位於新界荃灣區東北部，上葵涌之東北，大帽山與針山之間。咁即係邊度？真係講完都唔知點樣去。其實我都係靠睇谷歌地圖先至知道係邊度。要揸車去嘅話其實都有啲複雜，如果無導航嘅話，相信一定行錯路。事關入口係山頂，仲要係單程路。不過勝在夠隔涉，所以無乜人會去！
「公園」
一到咗假期，好多家長嘅煩惱就係帶啲小朋友去邊度。其實香港適合一兩歲小朋友玩嘅地方唔多，仲要啲遊樂場嘅設施可以比佢哋自己爬上爬落就真係少之又少。平時我都係睇地圖四圍搵香港有啲乜嘢公園，而今日見到城門谷嚟個地方好似有啲嘢啱小朋友玩，所以晏晝就揸架車一家大細去玩。城門谷公園真係幾大，但係最緊要係乜，就係比起好多遊樂場少人囉！原因佢真係好隔涉！
「設施」
真係估唔到香港有個咁嘅公園！入面有一個標準田徑運動場，網球場，足球場，籃球場，游泳池，兒童遊樂場，人工水景同好多好靚嘅花草樹木！當然如果唔係因為自己有小朋友嘅話，基本上都唔會去搵啲咁嘅地方。以前最多就係搵去邊度食嘢，而家就係去搵邊度啱小朋友去玩。香港其實最需要嘅就係草地，因為來來去去都係嗰幾撻地方！
Originally published at Kenneth Kwok (郭嘉俊).
