大家庭

「大企」

有時世界真係好細,因為真係唔知幾時會遇到啲人其實係某啲朋友嘅朋友,甚至乎係工作上面原來有啲淵源。尤其係大公司做嘢,好多時未必見過面,但係就通過電話傾過偈,甚至乎只係通過電郵交流。但係當大家真係見到面嘅時候,感覺就好似認識咗好耐,所以大公司就好似一個大家庭咁。不過而家好少人一份工會做好多年,好多時都只係過客,所以就無咗一家人嘅感覺。

「家庭」

有時真係好懷念係大公司做嘢,有時同舊老細講起以前嘅時候,大家都會異口同聲話好懷念以前嗰種一家人嘅感覺。當然好多人話無可能,但係直到依家大家雖然係唔同嘅地方,唔同嘅公司,唔同嘅職位工作,但係都保持聯繫,講真真係好難得。大家一齊拼搏奮鬥嘅日子,真係好耐無試過,因為過去七年都基本上係單打獨鬥。有時真係好難強求,因為真係緣份!

「屋企」

有時返到去一啲自己成長嘅環境,老實講真係好似返咗屋企咁。好舒服!無論係一張枱,一張櫈,每一樣嘢都似曾相識,就好似屋企嘅擺設。當然有啲人會話我誇張,但係對我嚟講嚟個地方係我成長嘅地方,就好似好多人會為自己畢業嘅大學而驕傲一樣,只不過培育我嘅唔係一間大學而係一間公司。雖然唔經唔覺已經離開咗七年,不過感覺依然好似離開咗好短時間!


Originally published at Kenneth Kwok (郭嘉俊).

Like what you read? Give Kenneth Kwok a round of applause.

From a quick cheer to a standing ovation, clap to show how much you enjoyed this story.