容許敗

「成長」
 每個人都想成功,但係成功嘅背後一定有無數嘅失敗。如果唔面對自己寫失敗,其實係無辦法成功。正所謂失敗乃成功之母,因此好多人都係係失敗中成長。經一事,長一智,所以有時係可以容許別人有犯錯嘅空間。如果沒次都唔容許別人犯錯嘅話,其實到頭來最辛苦嘅係自己。有時太過驚別人犯錯,所以每件事都親力親為嘅話,唔單止其他人唔會成長,就連自己都無機會成長!
 「失敗」
 無人天生出嚟就乜都識,更何況人總有嘢係唔識?每個人都係從錯誤中學習,因為人生總會有失敗嘅時候。其實由細細個開始慢慢培養小朋友如何係失敗同錯誤當中學習係好緊要,事關如果次次都只有成功無失敗嘅話,到佢哋大咗嘅時候就唔知道點樣面對失敗。當然都要睇下嗰樣嘢有無危險,所以如果有一個安全嘅空間同環境俾小朋友嘗試失敗,再從中教育佢哋其實不失為一件好事。
 「環境」
 係香港,好多人都希望贏,但係人生無可能永遠都贏。而亦都因為係咁其實你會見到好多香港嘅小朋友經唔起失敗,亦都唔知點樣應對失敗。好多時候環境係好緊要,只不過好多時係我哋令到小朋友無一個失敗嘅空間,原因係我哋越嚟越保護佢哋。每次當佢哋失敗之前,好多家長其實已經出咗手。當然忍手係一件好難嘅事,因為大家都想保護自己嘅小朋友,但係保護唔代表唔容許失敗。令小朋友學習失敗亦都係保護佢哋嘅其中一種方法。


Originally published at Kenneth Kwok (郭嘉俊).

One clap, two clap, three clap, forty?

By clapping more or less, you can signal to us which stories really stand out.