寫程式

「程式」

以前要學編寫程式我諗最起碼要去到大學先至有相關嘅課程。但係今時今日好多國家都已經推動加入編碼課程入小學嘅課程。其實現今社會好多嘢都需要程式，要寫一個程式就要識編碼。而其實睇落編碼有好多語言，但係其實編碼嘅理論都係大同小異。就好似我哋學講語言一樣，有啲好容易學得識，有啲就比較難。當然鐘唔鐘意就見人見智，事關唔係個個都鍾意對住啲程式！

「編碼」

我最早接觸編碼應該係小學，之後就應該係有網絡嘅年代，開始學寫網站。當然越想做多啲，越想做好啲，所以慢慢越學越多嘢。當然我從來無接受過正規嘅培訓，所有嘅知識都係通過係網上面學，之後就不斷咁試，試到得為止。雖然好多年無寫過任何嘢，但係我諗又係時候去進修下一啲新嘅嘢。學無止境，因為有時靠人不如靠自己。識編碼係現今社會必須嘅技能！

「生鏽」

過去咁多年其實真係冇乜接觸新嘅技術，而家其實你叫我寫程式有可能要花一段比較長嘅時間，因為真係有少少生鏽。不過因為自己想做一個新嘅產品，所以我諗係時候又要落手去學一啲新嘅編碼語言。力不到不為財，好彩自己唔係電腦白痴，有時都係靠自己好過靠人地。不過時間係最大嘅問題，因為年紀大機器壞，真係要有年青嘅體力不眠不休嘅精神先至可以成功！

Originally published at Kenneth Kwok (郭嘉俊).