屍殺後

「電影」

其實留意咗套韓國電影「屍殺列車」好耐，最初應該係社交媒體睇到預告片。講真以前大家都應該會睇過韓國電影，而近年韓國嘅電視劇同電影真係越嚟越好。雖然香港電影業發展比較早，但係近年真係無乜邊套電影真係叫好叫座。回歸正傳，一套好似生化災難片嘅喪屍片，竟然帶出一個又一個探討人性嘅訊息。所以如果你去睇嚟都係因為佢係喪屍片，因為睇特技，老實講你有可能會失望！

「韓國」

今晚同老婆去咗睇今期熱爆嘅韓國電影「屍殺列車」，果然好好睇！當然好多人會以為係一套傳統喪屍片，不斷咁逃跑，不斷咁打打殺殺，但係嚟套戲基本上連一隻喪屍都無死過，而且入面仲帶出好多訊息。如果你問我，我可以話嚟套係過去我睇過咁多套以喪屍為題材最好睇嘅一套。係呀，真係好睇過荷里活拍嗰啲，完全推翻傳統嘅喪屍片！如果你未睇嘅話，真係建議你快啲買飛入場睇！

「信息」

嚟套戲最好睇嘅地方係唔單止係一套喪屍片或者災難片咁簡單。入面帶出咗唔同嘅信息，當中主角同好多社會嘅家庭一樣，為咗搵錢，為咗工作，卻忽略咗老婆同個女。另外當人遇上災難性嘅事件嘅時候，其實好多時都會先顧及自己嘅利益同安危，不過戲中亦展現出捨己為人嘅精神。一套兩小時嘅戲，真係講盡人生百態。睇完之後其實反而係覺得緊張多過驚嚇，如果你有小朋友嘅話，一定會好洋蔥！

Originally published at Kenneth Kwok (郭嘉俊).