廿七個

「回顧」

話咁快又一個月，點解好似啱啱琴日先至寫完回顧今日又寫？或者每日同郭大少返學放學嘅日子就係咁，唔覺唔覺又一日，感覺今個月過得仲快咗。有時見到佢啲古靈精怪嘅樣就會諗起自己細個，真係好似唔似，不過就真係好搞笑。而家成日當自己好大個，樣樣都想自己嚟，但係做唔到又發自己脾氣，真係俾佢激鬼死。老實講，郭大少可唔可以大得慢少少呢？

「滿足」

每日起身見到郭大少嗰樣其實就心滿意足，每日佢都會叫我起身，叫我唔好瞓，因為要食早餐，睇書同陪佢玩。有時會同我講話要返學，再唔出門口就遲到，不過有時嗰日係星期六日就真係暈咗係度。有時放學接佢，一見到我係門口佢就好開心咁同我揮手，嗰一刻都真係幾無價。見到佢開開心心其實就已經夠了，因為小朋友就係應該開心咁過每一日。

「筷子」

今個月最大嘅改變應該係開始俾郭大少用筷子食嘢！因為好多時見到佢想用大人筷子，所以有次就開咗對學習筷子比佢用。教咗佢一陣點樣揸之後，佢就已經掌握到，重要好開心咁挾嘢食。而家基本上自己可以用筷子食完成餐飯，不過如果唔洗三催四請嘅話就會更好啦！有時不得不承認佢嘅學嘢速度，不過亦都因為咁所以擔心佢將來會好易學壞，因為學壞三日學好三年。

Originally published at Kenneth Kwok (郭嘉俊).