廿九個

「階段」

究竟郭大少返學係點嘅呢？今個月係人生第一次去家長會，其實都估到一二，不過見到佢係學校好開心就已經足夠。雖然香港嘅教育真係幾變態，因為佢始終都係一個兩歲人仔，見到佢一日一日長大就得啦！不過兩歲嘅人仔真係茶煲，經常性同你唱反調，又堅持樣樣嘢都要自己做，唔啱心水又發脾氣，但係又真係正常，因為每個小朋友都會經歷呢個階段，只係我哋真係俾佢激死！

「消防」

又一個月，今個月同郭大少做咗好多嘢！而佢最開心嘅就應該係去咗佢最鍾意嘅消防局睇消防車同消防員。而家每次經過消防局都問消防車同消防員係邊，一有消防車經過就勁興奮。問佢大個咗之後想做乜，佢會同你講做消防員。唔通個個小朋友細個都會幻想自己大個做消防員？其實細個我都有諗過而每次校車經過消防局都會睇下見唔見到消防員訓練。唔通遺傳咗？

「記錄」

今個月真係去咗好多地方，當然唔少得佢最鍾意嘅迪士尼啦，英國文化節，消防局開放日，食聖誕大餐，等等。最好笑嘅係郭大少係度扮聖誕老人講：「呵呵呵，Merry Christmas！」因為屋企有本關於聖誕節嘅書，真係俾佢笑死！最勁嘅就係我哋去友邦歐陸嘉年華，佢自己贏咗隻公仔返嚟，仲要係佢最鐘意嘅 Peppa Pig！而家啲小朋友真係好開心！

Originally published at Kenneth Kwok (郭嘉俊).