廿六個

「成長」

過下一個月,過下又一個月,郭大少又成長咗唔少。當然返咗學之後係有啲改變,最大嘅改變一定係多咗嘢講,唱多咗歌。有時真係估佢唔到,老師話佢唱歌唱到連隔離班嘅班主任都問究竟邊個唱歌唱到咁大聲。但係唔知係唔係因為突然之間要返三個鐘頭學,覺得佢比較攰同埋只係得我一個佢,所以有幾日我送佢返學竟然扭計唔肯入去學校。好彩之後都回覆正常!

「校園」

今個月郭大少開始佢嘅校園生活,而每一嘅生活亦有所唔同。雖然啱啱開始返學,但係又要開始準備同佢報幼稚園。當然希望佢可以入到一間適合佢嘅學校,等佢可以發展佢嘅所長,不過到最後都係睇彩數。其實真係無嘢怕,係怕佢學壞同發揮唔到佢嘅所長。當然每個小朋友都好唔同,有啲嘢佢真係好叻,但係要佢坐定定隻手唔好周圍搞就真係有點兒難度。不過每個小朋友都係有啲嘢要搞嘅。

「搞笑」

有時真係俾佢笑死,而家無啦啦會主動走去同其他小朋友玩,有時真係三唔識七就走去拖住啲小朋友隻手。以前佢真係只會顧自己,好少話要同其他小朋友玩。有時佢又會同你討價還價,樣樣嘢都話做多次先,但係做多次又再話做多一次,真係比佢激死。而家去到公園除咗自己上上落落玩滑梯之外,今個月學識爬啲鐵架,真係唔好低估一個兩歲嘅小朋友,唔知真係以為佢馬騮年出世。


Originally published at Kenneth Kwok (郭嘉俊).

One clap, two clap, three clap, forty?

By clapping more or less, you can signal to us which stories really stand out.