影完相

「影相」

每次旅行我都一定帶埋相機去影相,以前真係會帶幾支鏡頭同埋腳架去旅行。自己比較鍾意影風景,因為我影人真係唔叻,所以都係影下啲風景就算。而我最鍾意係影日落同夜景。因為每個地方嘅日與夜都好唔同,所以好多時都會特登去某啲景點影相。有時影相係為咗記錄自己去過嘅地方,因為有時真係去完太耐都已經唔記得去過邊。所以每次旅行都會影好多相返嚟!

「旅行」

每次去完旅行,其實最頭痕嘅係要揀相同執相。依家嘅數碼相機真係實在太方便,一日如果真係認證影相嘅話,真係閒閒哋都二三百張。所以一個旅程真係分分鐘有上千張相。當然唔係張張都靚,一般揀完都會有三分之一可以接受。以前我好少執相,但係唔知幾時開始有執相嚟個習慣。次次都話唔好影咁多,因為執相真係好辛苦,但係有時真係好難,事關錯過咗真係未必再返去!

「珍貴」

過去咁多年真係影影埋埋好多相,依家最驚嘅係唔見晒啲相。所以除咗放係自己屋企個伺服器之外,我亦都放咗係網上嘅儲存系統。因為之前屋企個伺服器差啲救唔返,所以真係好驚,之後即刻將所有相備份。依家真係無嘢怕,最怕真係無晒啲相,因為真係記錄咗好多回憶。所以話有啲錢真係唔慳得,反正依家嘅網上儲存空間都唔係好貴,點貴都唔及啲回憶貴!


Originally published at Kenneth Kwok (郭嘉俊).

A single golf clap? Or a long standing ovation?

By clapping more or less, you can signal to us which stories really stand out.