打份工

「打工」

其實有時打工係有打工嘅好處，因為有好多嘢都唔需要理，只不過要突破某啲關口其實除咗盡自己嘅本分之外，好多時真係要好睇公司本身嘅發展空間。要更上一層樓好多人會選擇去轉工，但係當人去到某個年紀嘅時候，轉工未必係一個最好嘅選擇。當然打工都有風險，因為幾大嘅公司，幾歷史悠久嘅公司都會有裁員嘅一日。唯一嘅工作係唔會俾人裁嘅話，當然就自己打自己工。

「回報」

唔記得咗係邊度睇過，有人問究竟係邊個發明打工嚟樣嘢！又好似係喎，其實人點解要返工，當然係因為現今嘅社會係要工作先至有回報。但係好多時就好得意，其實好多人都係打份工，但係佢哋就好似忘記咗自己係打工咁，當正間公司好似自己咁。其實係一間公司無論你做到幾高級都好，其實咪又係打份工。而打工當然係要盡自己嘅最大努力先至有回報，因為一分耕耘一分收穫嘛！

「生活」

自己過去都打過好多份工，但係當你睇返轉頭嘅時候就會發覺，其實好多時當你以為自己好重要，不過事實係一間公司唔會無咗你就營運唔到。嗰一刻你會覺得有啲心酸，因為你好似為公司付出好多，只不過現實世界就係咁。到自己營運公司嘅時候就好唔同，因為所做嘅每一件事係為咗每日嘅生活，到最後都係為咗生活而打工。所以生活先至係大家嘅終極老闆，大家係為生活而打份工！

Originally published at Kenneth Kwok (郭嘉俊).