抄邊個

「科技」

科技嘅嘢真係無得話邊個抄邊個,只係點樣將技術用得好與唔好。好多時睇落去好似一樣嘅嘢,但係背後就有可能用唔同嘅技術去開發。所以普通嘅人會話係抄襲,但係實質上真係抄襲?除非連原始碼都一樣,如果唔係其實唔可能話人哋抄你。只係功能上嘅大同小異,或者整體嘅概念一樣,老實講最多都只係炒橋而已!所以賣橋之前其實應該先保障自己嘅利益!

「抄襲」

因為港鐵嘅一個手機程式功能被另一間公司係網上控訴佢哋抄襲,而今日嘅香港網民又點會唔係網上面討論呀?好多人一開始都會鬧港鐵,作為一間大公司竟然叫啲細公司上去提供技術方案,點知原來聽完之後就自己抄咗整個方案自己開發。但係個技術好早係外國就已經有,唔通又話人哋抄你咩?科技嘅嘢就係咁,如果無申請專利,咁你講咗出嚟就唔係啲乜嘢秘密。無話邊個抄邊個。

「花生」

唔知點解好多人都無啦啦變咗做專家咁,佢哋好似知道事件嘅來龍去脈。一有人話自己俾人抄襲,就已經認定佢哋係苦主,然後指責。當然係好多層面港鐵係做得唔好,但不過今次亦都出奇地出嚟解釋。雖然對事件無幫助,只有知情人士先至有條件去評論。科技嘅嘢真係好難話邊個係原創,所以好多時如果真係要賣橋,雙方都需要簽署一份保密協議。最起碼有少少保障先!


Originally published at Kenneth Kwok (郭嘉俊).

Like what you read? Give Kenneth Kwok a round of applause.

From a quick cheer to a standing ovation, clap to show how much you enjoyed this story.