收音機

「科技」

年代唔同咗，而家啲小朋友其實知唔知乜嘢係收音機？或者佢哋而家連聽收音機嘅機會都無，個個淨係上網睇片。以前無咁多科技嘢嘅時候，相信好多人都會聽收音機。而家要搵一部收音機其實都應該幾難，自己大部分時間都係揸車嘅時候先至會開收音機。唔同以前無乜娛樂，夜晚通常都會開收音機聽歌。其實會唔會有一日嚟個世界再唔會有電台呢？

「電台」

唔知仲有幾多人會聽收音機呢？如果你有聽嘅話，通常幾時聽？聽邊個台？邊個節目呢？相信好多人嘅屋企都已經唔會有收音機，好多時聽電台嘅節目都係上網或者通過手機程式去聽。如果有揸車嘅話就或者會聽下新聞同交通情況。而收音機會唔會被淘汰？其實應該比較難，最起碼如果遇到重大事故嘅時候，收音機應該係一種仍然可以運作嘅媒體。所以古老唔係問題，最緊要係仍然有效！

「無綫」

有時真係覺得越簡單嘅科技就越難出錯，而收音機係其中一樣。當然無線電通訊唔淨只係發放訊息，其實仲有通訊嘅用途。如果今日叫一個小朋友去調較頻道嘅話，相信佢哋未必可以做到，事關唔係個個小朋友都知道點樣用收音機。雖然科技係可以取代傳統嘅媒體，只不過如果真係萬一出咗事嘅話，無線電或者可以救你一命嘅通訊工具。

Originally published at Kenneth Kwok (郭嘉俊).