放煙花

「影相」

係回歸之前,我印象中,每年淨係農曆新年香港先至會放煙花。所以可以影煙花嘅機會真係好少,不過依家香港每年都至少放三次煙花,所以可以影煙花嘅機會就多咗。以前每年我都會去尖東海旁影煙花,尤其係農曆新年,但係四年前嘅今日,突然之間同老婆講唔去影國慶煙花喇。點知嗰年就發生咗南丫海難嘅慘劇。自此之後,我亦都無再去影國慶煙花。

「十一」

自從回歸之後,每年嘅十月一日,香港都會放煙花慶祝國慶。以前好鍾意影煙花,因為影煙花真係好難,所以都會把握每次維港放煙花嘅機會去影相。不過自從南丫海難發生之後,我真係再無咁嘅心情去影煙花,因為真係唔覺得有啲乜嘢香港應該值得慶祝。每年嘅今日只係會令我諗起因為放煙花而導致嘅悲劇。而直至到四年後嘅今日,政府依然仲未公開所有嘅調查報告,真係離晒譜!

「意義」

本來放煙花係開開心心,高高興興,係為咗慶祝特別嘅節日。但係如果放煙花嘅意義已經失去咗,咁點解仲要放煙花呢?其實香港真係有咁多嘢要值得慶祝?除咗新年之外,其實七一回歸同十一國慶真係有必要浪費咁多人力物力去做一場騷?放煙花其實係會對環境造成嚴重嘅污染,所以可以放少啲未放少啲囉,而近年嘅煙花老實講,除咗開頭一兩分鐘可以清晰睇到之外,基本上大家係去睇煙多個花!


Originally published at Kenneth Kwok (郭嘉俊).

One clap, two clap, three clap, forty?

By clapping more or less, you can signal to us which stories really stand out.