救唔救

「齋講」

香港真係好多人只係將仁義道德掛係口邊,往往只係講就叻,做就難。而好多時有唔係當事人,亦都唔知道當時嘅實際情況就走出嚟指指點點,說三道四。老實講真係一個好唔負責任嘅行為!咁叻嘅話不如你去救啦!講到咁巴閉!做任何嘢都要顧及後果,好多嘢都真係唔可以逞強。尤其係一啲極端嘅環境,因為唔係你諗得咁簡單,話救人就救人。如果係咁嘅話就唔需要專業嘅救護人員啦!

「救人」

其實好多人都真係得個講字,永遠淨係講救人一命勝造七級浮屠!首先唔係自唔自私嘅問題或者道德嘅問題,而係如果一個人係一啲極端嘅環境嘅時候,佢有無能力去救人。如果無嘅話其實只係製造更多問題比其他人!佢選擇去唔救一個人係衡量過自己嘅能力,就好似有人遇溺而你唔識游水,明知跳落水到救唔到人,咁你仲跳唔跳落去救人?如果唔跳就係唔係見死不救?

「決定」

乜嘢叫做見死不救?就係你有能力去救人,而你只係眼白白咁企係度乜都唔做,就連打電話搵人幫手咁小事都唔做!但係一個女教師,無收過任何拯救嘅訓練,無任何救人嘅裝備,勉強去救人只會連自己嘅性命都賠上。因此佢哋無選擇去救人係衡量過當時嘅實際環境同情況,而唔係話見死不救!係,有時係好難取捨,但係咁嘅環境,即使真係幫人,恐怕到最後兩人都會喪失性命!


Originally published at Kenneth Kwok (郭嘉俊).

One clap, two clap, three clap, forty?

By clapping more or less, you can signal to us which stories really stand out.