教小孩

「教育」

每個父母都希望教好自己嘅小朋友，但係學問真係好多。唔同嘅父母都有唔同嘅教法，但係邊一種教法先至係有效，其實每個小朋友都唔同。而用錯方法嘅話其實係影響好深遠。有位朋友同我分享咗一個兒童心理學家嘅分享，睇完之後覺得講得非常之好，因為要教好一個小朋友首先係要了解佢哋特點！而當你了解佢哋之後，先至可以有效地咁教育佢哋。要學嘅嘢真係太多，而自己真係要改變一啲習慣。

「認識」

有時教小朋友真係好頭痕，或者真係用錯方法，因為對佢哋嘅了解唔夠！好多人都話啲小朋友好曳，教極都唔聽！不過原來問題唔係出於小朋友而係自己！小朋友好簡單，佢哋只有食玩瞓。係佢哋眼中無曳唔曳嘅概念，基本上同佢講道理佢哋係唔會明，所以要用簡單嘅規則同因果關係去處理。佢哋嘅情緒高低起伏會好大，但係亦都起跌得好快，所以唔好係小朋友情緒高漲時講道理。聽完真係茅塞頓開！

「形象」

大人要知道小朋友嘅發展有快有慢，千祈唔好同其他小朋友比較。而小朋友嘅自我形象十分重要，如果唔顧及佢哋嘅自我形象，將來會好難教。所以打佢哋其實係會損害親子嘅關係，而亦都對小朋友嘅身心發展有影響。千祈唔好被小朋友嘅情緒控制大人，首先要控制自己嘅情緒！避免經常重提小朋友過去所犯嘅過錯，因為咁樣係會減低小朋友嘅勇氣。講真要講真係有排講，要學嘅仲有排學！

Originally published at Kenneth Kwok (郭嘉俊).