整遊戲

「遊戲」

相信如果我問大家曾經玩過乜野嘅桌上遊戲，我諗大家一定會話大富翁。但係大家除咗大富翁之外，有無玩過其他嘅遊戲？其實係外國有好多唔同種類嘅遊戲，但係香港就唔係太多人玩。而原來香港有公司係專門設計同製作桌上遊戲，當中原來真係有好多學問。點解我會突然之間會講桌上遊戲？原因係因為今年再一次參加學生營商體驗計劃，而今年嘅產品應該會係一個桌上遊戲。

「設計」

大家有無諗過要設計一款桌上遊戲有幾難？依家大部份嘅人都應該唔會無啦啦拎盒遊戲出嚟玩，但係其實以前嘅遊戲先至係最好玩。見到今年嘅學生竟然決定製作一款新嘅桌上遊戲，而且佢哋係希望通過遊戲而道出時間管理，付出同回報，人生觀，等等。一班中學生竟然有咁嘅諗法真係估都估唔到。雖然仲係設計階段，但係今日睇到佢哋自己整嘅樣板，老實講真係好熱血！希望可以快啲見到製成品啦！

「幫忙」

見到一班小朋友，感覺就好似以前啱啱創業咁，有好多問題，有好多嘢要處理。不過嚟個亦都係個計劃嘅目的，就係要佢哋感受下營商係點樣。老實講見到佢哋一面讀書，一面考試，一面參加活動，真係幾辛苦。而家嘅新世代真係同我哋好唔同，有時都真係唔係太明佢哋嘅溝通模式。有時以為自己幫緊佢哋，其實係佢哋幫緊我去了解年輕人嘅世界多啲！

Originally published at Kenneth Kwok (郭嘉俊).