棍波車

「棍波」

有啲人一聽到棍波車就已經耍手擰頭，原因係覺得揸車已經夠多嘢去兼顧，重要顧及過離合器去轉波。而每當塞車嘅時候又覺得好麻煩，所以好多人就算識揸棍波車都唔會選擇去揸。當然揸車應該係一種享受，而唔係一種折磨。當然現今嘅科技發達，自動波箱越來越先進，只不過就去越多電子嘢就越容易壞。有某啲品牌嘅自動波箱出咗名易壞，買車就好似買大細咁，好彩嘅到你賣嘅時候都唔會壞，唔好彩嘅就經常壞！

「渣車」

想問下而家仲有幾多人識渣棍波車？當然我認識嘅朋友當中好多都識啦，但係今時今日仲有無人學車嘅時候係學棍波嘅呢？又或者就算你識揸亦都選擇揸自動波嘅車呢？其實而家有好多新車都無棍波俾你揀，因為大部份嘅新車都已經採用半自動波箱。所以而家真係越嚟越少人識得或者選擇揸棍波車。如果你問我嘅話，講真識得揸棍波嘅先至係識得揸車。

「操控」

有時真係好想揸返棍波車，但係一諗到香港塞車嘅嚴重性就真係令人卻步！而當一架車有越多電子儀器同設施嘅時候，壞嘅機會率係大大提升。所以有時反而鍾意啲舊車，因為電子嘢少，壞嘅機率就越少。當然而家有好多自動波箱嘅設計真係好先進，不過有時真係覺得同揸棍波車嘅感覺好唔同。無可否認嘅係一般人都會選擇揸自動波，但係就算唔係日日揸都好，最起碼都要識操控一架棍波車先至得。

Originally published at Kenneth Kwok (郭嘉俊).