港學生
「壓力」
係香港,好多小朋友都要面對唔同嘅壓力,尤其係學業嘅壓力!其實過去咁多年,不時都有學生跳樓嘅事件發生,而今年已經發生咗好幾次。點解啲小朋友會去到自尋短見嘅地步呢?小朋友唔係應該開開心心咁生活,無憂無慮咁成長,但係偏偏係香港小朋友嘅壓力就特別大。歸根究底都係因為香港嘅教育制度同社會價值嘅問題。我經常問,究竟教育呢兩個字係點解?教育嘅原意係乜?
「無奈」
每次睇到有小朋友因為唔同原因而選擇結束自己嘅生命都會感到無奈!無奈嘅係咁多年嚟香港唔係第一次發生啲咁嘅事!如果因為學業嘅壓力,其實政府係有一定嘅責任,另外就係社會同家庭嘅責任!係人都識講求學唔係求分數,但係偏偏個社會就利用分數同排名去決定一個小朋友嘅能力。老實講,好多成功嘅人讀書都唔叻,但係偏偏佢哋嘅成就就遠超過啲讀書叻嘅人!當然我唔係鼓吹大家唔讀書,只係大家係唔係要檢討下我哋自己?
「比較」
人比人,比死人!雖然我好多時都會同其他人比較,但係人越大,慢慢就覺得點解要在乎人哋點樣?經歷過好多嘅起起跌跌,其實最緊要係自己生活開唔開得心!睇到香港嘅小朋友由出世開始就已經不斷俾人比較,老實講有咁嘅必要咩?當然我都想自己嘅小朋友有好嘅發展,但係香港嚟種填鴨式嘅教學模式其實抹煞咗佢哋!教育嘅本質係學習人類文明成果,而唔係去複製人類文明成果。如果係複製嘅話,咁人類會進步咩?
Originally published at Kenneth Kwok (郭嘉俊).