無目的

「文章」

每日寫文章嘅目的係乜嘢？係唔係因為有目的先至寫文章？好多人覺得我好無聊，點解每日都用一定嘅時間去寫文章。當然有時我都唔知道點樣可以答佢哋，但係好多場合我都可以用自己嘅網站做實例，其實已經係值回票價。當然日日寫文係無回報，甚至乎有時因為諗唔到寫乜，需要去搵唔同嘅題材，所需要嘅時間同心機就會比較長。不過有時我都真係會當啲文章係自己嘅回憶，等自己記得曾經發生過嘅乜嘢事同物。

「目的」

今日上堂又俾啲學生問我究竟寫文嘅目的係啲乜？老實講真係無乜嘢特別嘅目的。而當初開始嘅時候真係只係想將平時講嘅嘢，同經常講嘅嘢寫低。真係無諗過可以堅持到接近三年，仲要日日寫四五百隻字。不過因為嚟個堅持，無論係文章嘅格式，甚至發佈嘅渠道，等等，都幫我收集到一啲好有用嘅數據。當然有無人睇我唔係太過在意，而係過程入面所學到嘅嘢先至緊要！

「數據」

無嘢值錢過啲數據，而因為每一日都會寫一篇文，用同一個格式同發佈方法，慢慢收集返嚟嘅數據就有研究性。就好似一個實驗室咁，係一個特定嘅環境入面做研究。當然要做研究需要更多嘅數據，而係現有嘅數據入面其實有好幾個研究嘅方向。正如我之前講過，除咗數字之外，文字係我認為最值錢嘅嘢。其實數字同文字嘅關係好密切，但係如果因為數字而改變文字，其實真係本末倒置！

Originally published at Kenneth Kwok (郭嘉俊).