狂執嘢

「搬屋」

唔執唔執都係要執，因為就要搬屋但係一直都唔想去執。越接近搬屋就越唔捨得而家住緊嗰度，因為自己由細到大都係住係港島東。今次真係第一次搬去新界區，但係為咗老婆同個仔，當然希望比一個大啲同舒服啲嘅地方俾佢哋生活。不過搬屋真係好痛苦，執嘢走人真係執到人都癲。得番幾日時間當然就係全天候係屋企將啲嘢入箱，雖然好多嘢係預咗要搬唔洗執，但係始終都有好多嘢要整理。

「執嘢」

其實我真係好怕搬屋，因為執嚟執去都好似未執完。對上個次搬屋係五年前，而當時只有一個人嘅嘢，所以都唔算用咗好多時間，咋咋臨執完就走人。但係過去嗰五年，身邊多咗老婆同個仔，一間幾百呎嘅屋真係塞滿晒嘢。如果係啲易執嘅嘢例如書，模型，文件，影碟嗰啲都仲話易搞。但係啲疏疏碎碎嘅物件真係人都癲。最麻煩嘅莫過於啲打得爛嘅嘢！

「痴線」

當開始執屋嘅時候，我相信好多人都會有咁嘅感覺，就係間屋咁鬼細點解可以塞得落咁多嘢。諗嚟諗去其實過去幾年都無乜買嘢，至少無乜買衫，甚至將一啲無用嘅嘢買咗或者揼咗。點解間屋可以有咁多嘢，真係諗唔明。所以依家只可以埋頭苦幹咁執執執，而且唔明點解香港有咁多灰塵，日執嘢啲灰塵周圍都係，所以部吸塵機真係隨時出動。不過最慘嘅係辛苦執完，之後咪又係要開箱拎返出嚟！唉。。。

Originally published at Kenneth Kwok (郭嘉俊).