睇燈飾
「燈飾」
Published in
2 min readDec 26, 2015
香港每年喺維港兩岸都會有好多大廈佈置咗好多好靚嘅聖誕燈飾，所以每年都吸引咗好多人去影相。當然睇燈飾唔係拍緊拖嘅就係一家大細，再唔係就係旅客。你細細個嘅時候有無同屋企人去過睇燈飾？但係依家嘅燈飾同以前好唔同，因為以前係用燈膽，依家好多新嘅裝飾都已經用一啲新嘅技術。不過咁多年，係大廈外牆掛燈飾嚟個習俗一直都無變過！
「聖誕」
聖誕節當然每個小朋友都會好開心，除咗有聖誕禮物同食聖誕大餐之外，好多人都會帶小朋友去尖東海旁到影燈飾。我相信好多人細過嘅時候，爸爸同媽媽都會帶佢哋去。當然我都唔例外啦！我其實都好記得以前同屋企人去睇燈飾，當然有時睇番啲相都記得當時嘅情景。好啦自己今年亦做咗人哋老竇，所以今年同老婆講我想帶個仔去影燈飾。因為我都希望佢大個嘅時候記得我哋有帶佢去睇過燈飾。
「外出」
其實帶著個仔去睇燈飾係一件幾麻煩嘅事！點解，因為真係好多人，而你除咗要顧住個仔之外，你仲要抱住佢影一張靚相。好彩我個仔都唔係好扭計，但係因為第一次去啲咁多人嘅地方，佢超級八卦同仲未知相機鏡頭係邊，所以要影到佢望鏡頭都要花啲時間！但係真係好耐無同老婆出去食餐好，所以揀咗間我好想去嘅餐廳食咗餐飯，而仔仔都算俾面無乜扭計，至少我哋都可以慢慢食餐聖誕飯。
Originally published at Kenneth Kwok (郭嘉俊).
