砌手機

「深圳」

好多人知道深圳有好多電子嘢,原因係因為有好多電子嘅製造商係中國設有廠房生產各式各樣嘅產品。所以深圳有好多唔同嘅電子市場,入面真係乜都有。其實之前係大連工作,其實都有啲類似嘅市場。有時真係唔好睇佢噏噏耷耷,入面真係可以搵到一啲你諗都諗唔到嘅嘢。有時你會問係香港買咗部手機之後,啲人會點樣處置佢,相信好多時都會拆件然後去到嗰啲電子市場。

「變態」

真係好變態,竟然有一個外國人去咗深圳之後諗,自己可唔可以去搵齊一部蘋果手機嘅零件然後自己砌返一部出嚟!我相信好多人會話黐線嘅咩?邊度有可能可以自己買零件去砌手機㗎!只不過經個多月嘅努力,嚟位外國人真係係深圳搵到晒所有所需嘅零件,然後真係砌咗一部蘋果嘅電話出嚟!真係佩服佢嘅精神,而再一次證明乜嘢都真係有可能係中國發生!

「回收」

老實講砌電腦真係砌得多,但係真係無諗過真係有人會去買零件去砌一部手機。唔知佢咁樣砌一部手機要幾多錢?如果一個外國人都可以砌到嘅話,相信好多人都可以。所以有時買手機都係買全新好,因為真係唔知啲所謂嘅二手電話係唔係用啲零件砌返出嚟。不過再一次証明乜嘢都有可能,而且可以知道蘋果手機入面嘅所有嘢都係可以拆件同回收。相信好多手機製造商都未必得!


Originally published at Kenneth Kwok (郭嘉俊).

Show your support

Clapping shows how much you appreciated Kenneth Kwok’s story.