老夫子

「漫畫」

相信好多人都會有睇漫畫嘅習慣，當然本地嘅漫畫家唔多，大部份嘅人都會睇日本漫畫為主。而係香港最為人熟悉嘅漫畫就應該係《老夫子》！唔知有幾多年輕人有睇過《老夫子》嚟本漫畫，就算而家睇番都會覺得好好笑。其實《老夫子》陪伴咗好多香港人成長，不論男女老幼都唔會唔記得入面嘅人物：老夫子，大番薯，秦先生，陳小姐等。唔知大家屋企仲有冇《老夫子》嘅漫畫呢？

「王澤」

王家禧先生係本地漫畫大師，六十年代創作《老夫子》漫畫。佢透過獨特嘅繪畫風格，簡單而詼諧嘅故事，展現咗香港社會係不同年代嘅生活面貌，反映人生百態。而王家禧先生係用佢大仔個名「王澤」作為《老夫子》嘅筆名。因為王家禧先生年紀漸老，係一九九五年由原本學建築嘅王澤接替爸爸，繼續創作《老夫子》漫畫。而讀者則以「老王澤」，「小王澤」區分兩父子。

「無題」

其實為一篇文起題係一個好大嘅挑戰，就好似我啲文章咁，下下三個字都認真嘅難。有時真係諗都頭都爆。《老夫子》漫畫入面最令人印象最深嘅標題，應該非「耐人尋味」莫屬。而點解好多故事嘅標題都用「耐人尋味」？其實王家禧先生曾接受傳媒訪問講過，原因係好簡單：因為諗唔到寫乜囉，所以隨你點諗。不過我自己就覺得「無題」比起「耐人尋味」同「禍不單行」更加反映到人生嘅變幻莫測。

Originally published at Kenneth Kwok (郭嘉俊).