考完試

「時候」

我其實唔鍾意考試,最努力讀書嘅時候應該係高中,因為希望自己考到入自己心儀嘅大學,去讀自己鍾意嘅科目。當然到最後失望而回,但係諗返嗰陣時真係自己最勤力讀書嘅階段。之後隔咗好多年再重返大學已經係十幾年之後,而其實我唔係為求分數,只要畢到業就已經足夠。當然考試係要盡自己最大嘅能力,只不過有時見到自己啲學生無盡力考試嘅時候,其實心入面都會有少少唔開心!

「完結」

今日又係一個年度嘅終結,今年返大學教書嘅日子又完結,而家淨係改埋啲試卷比埋分就要等到出年先至再會返去。今年學生人數應該係咁多年嚟最多嘅,不經不覺有好多自己嘅學生都已經大學畢業兼且做咗好幾年嘢。真係唔到你唔認老!因為有時出街都會撞到啲學生同自己打招呼,嗰一刻真係覺得自己好老!不過見到班後生個個都做得好好其實就已經好滿足,雖然我只係教過佢哋四年大學嘅其中一課!

「試卷」

今年最好笑嘅係自己啲學生竟然考完試之後同我講佢哋覺得份卷好難,係佢哋做過最難嘅試卷!無可否認一個三個鐘頭嘅考試,二十條選擇題,三揀二嘅問題要寫四頁紙,再加一個案例要寫四頁紙,其實真係有啲難度。不過我覺得係需要嘅,因為如果我教完佢哋唔吸收係我嘅責任。老實講考試唔辛苦,改卷先至辛苦!有時真係好佩服啲老師改幾百份,真係人都癲!


Originally published at Kenneth Kwok (郭嘉俊).

A single golf clap? Or a long standing ovation?

By clapping more or less, you can signal to us which stories really stand out.