蕩失路

「地圖」

每個人嘅人生都總會有行錯路甚至乎蕩失路嘅時候。人因為生唔係一張地圖，不過有起點同終點，但係我哋唔會有自動導航話俾你聽點樣行，與此同時亦都無地圖同指南針！所以點樣行其實無人話到俾你聽，當然沿途上會遇到好多人同事，有時係指路明燈，有時就令你更加迷失。好多時就算知道方向，只不過條路又未必咁易行，與此同時亦都只可以靠自己嘅能力撐落去。

「人生」

其實蕩失路無嘢驚，最驚嘅係無方向。以前做嘢都會有一個明確嘅目標，知道每一步點樣行，但係今年真係完全蕩失路。兜兜轉轉都仲未搵到出口，有時以為見到曙光，點知又係幻象。真係唔知幾時先至可以走出嚟個迷宮，所以只可以繼續搵出路。時間不饒人，今年仲有幾個月就完結，基本上已經兜圈兜咗近一年，真係要快啲搵到正確嘅方向，離開嚟個鬼地方。

「資源」

係蕩失路嘅時候其實最緊要就係唔好亂，因為自亂陣腳就更加搵唔到出口。而且好多時資源有限，如果唔快啲搵啱方向，總有一日啲資源就會用晒。當然沿途可以搵唔同嘅資源去繼續維持，只係嗰啲資源可以維持到幾耐就真係無人知。出路唔係得一個，如果向好方面諗，或者兜咗去一個比原來仲好嘅地方。大前提就係要係資源耗完之前一定要搵到嚟啲出口，如果唔係真係死咗都無人知

Originally published at Kenneth Kwok (郭嘉俊).