蕭叔叔

「博客」

好多人或者唔知蕭叔叔其實好多年前已經係一個有名嘅博客！蕭叔叔原名蕭愷一，畢業於港大法律系。不過佢熱衷英文教學，係英國留學嘅時候創立自己嘅網誌。而擁有國際音標專業資格嘅蕭叔叔，以獨特出位嘅教法，傳授讀音，文法，用字及寫作等技巧，深受歡迎。短短半年之間就已經累積咗二百萬次瀏覽，更係二零零七年獲得全球華文部落格大獎，成為首位獲此殊榮嘅香港人，受到本地同海外華文傳媒廣範報導。

「洗版」

今晚基本上係俾蕭叔叔洗版，因為今晚朋友搞嘅一個聚會蕭叔叔去咗。當然好多人無見過蕭叔叔嘅廬山真面目，所以好多人都去搵蕭叔叔影相！不過點解全部都係背影？如果有睇開蕭叔叔嘅專頁嘅話都知道佢有一個習慣就係唔會出樣！當然要知道蕭叔叔係點嘅樣其實唔難，網上搵一搵就好容易搵到啦！不過今晚同佢緣慳一面，因為有工作在身無辦法出席活動！葡萄中！

「英文」

蕭叔叔嘅粉絲都係以年輕人為主，因為佢夠真，好識抽水，同經常自嘲。不過佢啲英文真係好英國！如果淨係聽佢把聲，真係以為係一個英國人講緊嘢！因為佢真係無晒香港人講英文嗰啲口音！有時都真係好佩服佢一手一腳自己攪點晒所有嘢，因為真係唔係可多人好似佢咁可以一手包辦所有嘅製作！當然好多時都好鍾意佢將香港嘅潮語去做主題，然後教大家英文點樣講。其實真係好有趣！

Originally published at Kenneth Kwok (郭嘉俊).