螢光棒

Kenneth Kwok
2 min readSep 13, 2016

--

「螢光」

螢光棒入面係含有雙氧水,苯基草酸酯同螢光染料,我哋只要屈曲螢光棒再令到螢光棒入面裝有化合物嘅玻璃管斷開,當各種化合物及染料混和之後就會有發光嘅效果。早係二零一四年,其實已經有報告指出螢光棒入面嘅物質大多數係苯二甲酸二甲酯同苯二甲酸二丁酯。一旦洩漏就有機會引致吸入性中毒,皮膚接觸性中毒及誤食性中毒。小朋友接觸到嘅話,更有機會出現頭暈,麻痺同昏迷嘅狀況。

「環保」

相信好多人都會玩過螢光棒,但係好少人會知道螢光棒對環境嘅影響。每年嘅中秋節,好多大人同小朋友都會玩螢光棒,而要回收螢光棒真係一件不可能嘅任務。點解?事關要將螢光棒入面嘅化學液體同細小嘅玻璃碎取出係要好小心,而且液體係有毒性同怕被玻璃碎整親,所以真係非常費時失事。另外螢光棒只供大家玩幾個鐘頭,所以大家係短短幾個鐘就會製造大量嘅污染物。

「污染」

雖然現時仲未有對於螢光棒內嘅物質有清晰嘅健康測試,但係令螢光棒發出粉紅色光嘅染料就被懷疑係致癌物質。所以如果不慎吞咗螢光棒入面嘅液體,有機會有灼熱同反胃嘅感覺,如果接觸到眼睛之後甚至乎會引致敏感。因為螢光棒入面仲有玻璃碎,所以家長一定要非常注意,唔可以俾小孩咬碎或者扭斷螢光棒。如果我哋玩完螢光棒之後,就算啲垃圾被送去堆填區,螢光棒入面嘅化合物亦好難被分解。所以大家中秋節都係唔好玩螢光棒啦!

Originally published at Kenneth Kwok (郭嘉俊).

--

--

Kenneth Kwok

到處奔跑的香港人,畢業於澳洲麥覺理大學工商管理碩士,近年專注數據分析行業推廣同發展。曾從事平面設計,網站開發,企業管理及商業諮詢等工作。早於 2009年開始舉「香港數碼分析星期三」同「亞洲數碼分析高峰會」。於 2010 年創辦 Beehive Strategy ,為亞太地區不同企業提供數據分析服務。