記憶力

「記憶」

人嘅記憶真係好得意，以前考試要背書，十版八版嘅論文都無問題，可以一字不漏咁寫返哂出嚟。細個下下都真係靠個腦記住，但係慢慢就會發覺越嚟越多嘢要記，好似無以前咁好記性，所以都會寫低。當有咗電腦之後就會開個記事簿寫低佢，不過好多時都唔會睇返甚至乎唔記得寫咗係邊。雖然話方便，但係始終會漏嘢。到最後都係唔記得咗，醒起嘅時候都已經太遲了。

「紙筆」

依家啲記憶力真係差到一個點以為自己老人癡呆，經常性無記性，明明個頭先至睇完嘅嘢好快就忘記咗。以前記八個字嘅電話號碼基本上睇完一次我就會記得，但係而家就真係要睇幾次或者要寫低先至記得。而家好多時諗嘢都真係要寫低，就算有時打咗落電腦其實都真係未必下下睇返。最好嘅夥伴都係一本簿同一支筆。好多嘢真係要即刻處理或者寫底，如果唔真係好快唔記得。

「衰退」

最近見到有所謂提高記憶力嘅糖，其實有無用真係無人知。不過人就係咁，隨著年紀長大，記憶力係會漸漸衰退，嚟個係無可改變嘅定律。所以寫文都係一個好嘅方法，等自己仲記得嘅時候記錄落嚟。希望若干年後睇返會記得返自己寫過嘅嘢。有時真係唔係特登唔記得，只係個腦太多嘢諗同有太多嘢要處理，所以有時老土啲嘅方法都係咁話，寫低佢一定就唔會唔記得，真係唔好以為自己十八廿二。

Originally published at Kenneth Kwok (郭嘉俊).