越希望

「成功」

每個人都希望自己可以成功去達到自己嘅目標。只不過世事往往都係會同你背道而馳！有時成功都只係要睇彩數，係你就係你，唔係你就唔係你。當然好多人會話你唔努力，唔堅持，所以先至唔成功。但係嗰啲人又真係知道你付出過幾多咩？就算講佢哋都唔會明，因為係佢哋眼中只有成功與否。到最後要面對嘅亦都只有自己，跌低起返身亦都係要自己，過程中有幾唔開心又有邊個知？

「希望」

前幾日係社交媒體見到有位朋友講，有越係希望成功，就越係做唔到！睇完之後感受極深，因為越係想做好啲越做得唔好。就算幾樂觀面對問題都好，仲有心情唔好嘅時候。有時真係希望越大，失望越大！正如我位朋友講，有時候唔係努唔努力嘅問題，而係要放低一定要成功嘅包袱。唔好理其他人，而係更加用心去做自己認為最好嘅嘢！有時堅持一件事真係好難，要面對嘅壓力實在難以形容！

「失望」

自從二十幾年前考大學嘅時候面對人生嘅最大衝擊之後，其實已經學識咗唔好對任何嘢有期望或者希望。自己雖然盡咗最大嘅努力，而成績其實唔差，只不過因為制度嘅問題，影響自己嘅分數。當然有啲人話你唔識玩個遊戲，而我承認我真係唔識玩，而我亦覺得無必要。所以咁多年嚟我做嘢都只係做自己認為啱嘅嘢，如果隨波逐流嘅話，相信嚟個唔係真正嘅我，只係有幾多人會認同我，同我齊上齊落呢？

Originally published at Kenneth Kwok (郭嘉俊).