車仔麵

「平民」

車仔麵係經典嘅港式平民美食。好多都係藏身於街頭巷尾，靈活多變，一撮油麵，十幾廿款嘅餸菜任意挑選！再加兩殼熱湯，淋匙辣汁就係一碗庶民嘅車仔麵。其實要整一碗車仔麵嘅功夫真係好多，而且利潤低，要做得好食真係談何容易。究竟邊到有好食車仔麵？相信每個人都有一間自己喜歡嘅小店。點解係小店？因為只有小店嘅先至好食！你又覺得邊間係香港最好食嘅車仔麵呢？

「食品」

好多香港人都鍾意食車仔麵，而要搵一碗好食車仔麵其實真係好難。一碗好嘅車仔麵除咗啲餸要好食之外，其實個湯底都好緊要，因為就算啲嘢幾好食都好，如果湯底唔好味嘅話，其實都幾影響成碗麵嘅質素。一碗車仔麵除咗可以滿足唔同人嘅要求之外，最重要嘅就係價錢！當然有平有貴，而每個人嘅配搭都唔同，咁你最鍾意嘅配搭又會係啲乜嘢呢？

「配搭」

一般如果我食車仔麵嘅話都會係咁嘅配搭，首先當然係要叫個粗麵，然後就係豬皮，豬紅，蘿蔔，雞翼，而湯底就要加腩汁。車仔麵另一個最佳拍檔就當然係一支可口可樂啦！以前最鍾意嘅就係去銅鑼灣皇室堡後街食榮記。嗰陣時佢哋仲未有鋪頭，但係佢哋啲豬紅真係食咗咁多間都無一間比佢哋嗰啲更好食。之後返咗嚟香港住係西灣河就當然係去嗰間超級無敵車仔麵啦！

Originally published at Kenneth Kwok (郭嘉俊).