返校園

Kenneth Kwok
Jan 17, 2017 · 2 min read

「教書」
有時我都係度笑自己,因為自己十幾年前有書唔讀走去創業,而家反而每年都有幾會返大學。雖然角色唔同咗,感受亦都唔同咗。每年都會因應市場嘅變化去調整自己嘅教材,務求將最新嘅知識同經驗傳授俾班學生。雖然有時話去教書,其實另一方面係去學嘢,因為係一班年輕人身上係可以學到好多嘢。今日又係新一年嘅開始,希望佢哋唔會俾我嚇親。今年應該係過去咁多年最多人報名嘅一次。
「大學」
每一年其實我都會期待返去大學教書,雖然唔講得上作育英才,但係可以將自己所學嘅傳授俾我哋嘅下一代,其實嚟樣嘢先至最緊要。當然最希望佢哋可以學以致用,而每次係學校以外嘅地方遇到自己嘅學生,感覺真係幾得意。唔經唔覺真係一年又一年,今年原來已經係第六年返大學教書。有啲學生雖然未必做番自己修讀嘅學科,不過見到佢哋個個都有好嘅發展,其實就已經足夠。
「盡力」
過去一年真係不斷去教書,一教就係整個課程。有時自己教到有啲精神錯亂,因為有時自己以為講過嘅嘢原來無講過。有時連續幾日不停講嘢,把聲真係會有啲攰。但係有時就覺得有機會去教書當然去教啦,因為改變一個得一個,希望多啲人認識數據,等個市場有更多人投身數據分析嚟個行業。如果有其他大學或者機構搵我教書嘅話,相信我都會盡我所能將自己所識所學嘅傳授俾下一代。


Originally published at Kenneth Kwok (郭嘉俊).

Kenneth Kwok

Written by

到處奔跑的香港人,畢業於澳洲麥覺理大學工商管理碩士,近年專注數據分析行業推廣同發展。曾從事平面設計,網站開發,企業管理及商業諮詢等工作。早於 2009年開始舉「香港數碼分析星期三」同「亞洲數碼分析高峰會」。於 2010 年創辦 Beehive Strategy ,為亞太地區不同企業提供數據分析服務。