錯過咗
「後悔」
你人生錯過咗啲乜嘢會令你最後悔?有啲人係話感情,有啲人係話工作機會,有啲人話陪伴自己仔女成長!當然每個人係人生入面都會錯過咗某啲嘢,但係如果你問每一個父母嘅話,好多時佢哋最後悔嘅原來係無陪伴自己仔女頭個幾年嘅成長!好多人都會話因為生活,所以無辦法!或者嚟個係香港嘅社會問題,所以好多人就算知道會錯過自己仔女成長嘅階段,但係都無辦法!
「成長」
其實真係唔止一次聽到有朋友話自己錯過咗仔女頭嗰幾年。而家佢哋都好後悔當初點解唔俾多啲時間佢哋!因為小朋友真係大得好快,而當佢哋識行識走,開始返學嘅時候,佢哋就唔會好似頭幾年咁依賴父母。當然好多人都要為兩餐,有幾多人真係可以乜都唔做淨係專注湊小朋友?要平衡家庭同工作真係好難,錢其實真係幾時都可以搵得返,只不過有啲嘢有錢都買唔返,就好似時間同健康。
「陪伴」
當然自己好清楚小朋友係希望自己嘅父母陪伴多啲,唔係淨係朝頭早見一見就急急腳去返工,之後返到屋企又無時間陪佢哋玩。分分鐘除咗星期六日之外,可以陪伴佢哋嘅時間就真係得嗰幾個鐘頭。有時雖然好懷念東奔西跑嘅日子,但係亦都知如果錯過咗佢哋長大嗰幾年,其實之後點樣去補償到無用,因為錯過咗就係錯過咗。雖然唔知有無揀錯,但係自己真係唔希望將來會後悔!
Originally published at Kenneth Kwok (郭嘉俊).