長崎縣

「長崎」

去到第二日嘅旅程，首先就當然去攞車，然後就出發去長崎縣嘅豪斯登堡。去到嘅時候真係以為自己去咗外國，因為豪斯登堡係一個位於日本長崎縣佐世保市，模仿荷蘭街道所設立嘅一個主題公園。面積有一百五十二公頃，除咗荷蘭風格嘅主題外，目前園區內亦都包括一啲歐洲其他地區風格嘅造景，而園區亦成為好多電視劇，電影同廣告嘅外景拍攝場地。

「歐洲」

真係無諗過日本竟然有一個咁嘅地方，一個充滿歐洲色彩嘅主題公園。雖然豪斯登堡未必適合郭大少咁細個小朋友去，因為園區入面只有一少部分係適合佢哋玩，但係入面真係好大。未入去之前有一個貓頭鷹館，入面有好多貓頭鷹，而入咗去園區入面就基本上都係歐陸色彩嘅建築物。或者因為冬天嘅原故，感覺上好似空空蕩蕩，但係入夜之後就有另一番嘅景色。

「旅程」

去程嘅時候咁啱遇著落雪，真係好耐無去過落雪嘅地方，而亦都無諗過今次嘅旅程會係咁凍。本來無諗過可以係豪斯登堡玩一日，因為如果唔係去睇入面嘅表現同玩入面嘅設施，基本上都只係行下睇下。不過好多海賊王嘅粉絲都會去到園區嘅另一端去睇嗰隻海盜船。到咗夜晚就有花車巡遊，而咁啱夜晚當地又落起大雪，所以都幾特別！就係咁第二日嘅旅程就只係去咗豪斯登堡。

Originally published at Kenneth Kwok (郭嘉俊).