天地人

「天時」

好多人都說話時機係好重要，無論做任何嘢時機都係成功嘅一部份。正所謂時勢造英雄，英雄造時勢，就算你有條件都好，其實都未必可以一展所長。其實人生好多時都要睇機遇，而有時係需要等待。認識好多朋友都係經過好多年嘅堅持先至等到一個機遇，但係亦都有好多朋友因為唔同嘅原因中途被逼放棄。所以當機會嚟到嘅時候無好好把握嘅話，當機會走咗嘅時候就白白錯過。當然係機會嚟到之前亦要裝備自己，如果唔係就算機會嚟到你都未必準備好。

「地利」

除咗時機之外，要成功嘅另一個要訣係地理環境。雖然依家好多時都已經係講緊全球化，但係如果可以把握到地理嘅優勢，好多時都會事半功倍。而有時幾會亦都因應地理環境而改變，所以唔同嘅人都會去嘗試係唔同嘅環境做同樣嘅嘢，因為係一個地方唔得唔代表其他地方唔得。有時環境條件分分鐘可以製造出好嘅時機，只不過成功係唔係一定受環境限制，有時無可厚非的確係。因此要有時成功係要利用地理環境嘅優勢先至有所為！

「人和」

天時不如地利，地利不如人和。而成功除咗取決於時機同環境之外，最緊要係人！因為一個人嘅成功唔係孤軍作戰就可以，係要獲得親朋好友嘅支持同幫助先至得。就算有幾好嘅時機，就算佔盡最好嘅地理位置，但係無一個好嘅團隊，單憑自己一個人嘅能力其實係無可能有突破。只不過人比起時機同地理更難去掌握，事關人會變，就算今日支持你，聽日亦都可能背叛你。所以要「天時，地理，人和」三個條件係同一時間出現真係同賭大細一樣要開圍骰先至可以通殺！

Originally published at Kenneth Kwok (郭嘉俊).