『妳就好啦,妳走到,唔洗理香港啲野啦!』
Sep 3, 2018 · 6 min read
好耐無出長文。其實真係好多開口埋口都係呢句,但又咩都唔肯做嘅人。、
『妳就好啦,妳走到,唔洗理香港啲野啦!』你以為啦。唔通人哋問我係咩國人,我話自己來自鄰國咩?
要一個人放低所有嘢離開,唔係話走就走,亦唔係見到香港越來越爛會完全無感覺㗎!!!除非你本身都唔care香港。
我好早就叫大家學外語(唔係英文,英文係香港嘅法定語言之一,識英文係基本,如果自問太爛一定要進修,英國文化協會有好多courses自己搵),學多啲手藝,發掘自己能力/發展事業,而唔係坐係度怨中國人又點點點,示威膠行然後話要走就走到。我都要靠自己儲錢交學費學文法煩過英文N倍嘅德文,要自己搵工搵屋,搞工作簽證,自己再聯絡外國朋友建立網絡,好努力咁融入社會,唔係老豆老母比錢扔我過嚟坐吓然後返香港話自己係邊度留學威威豬,亦唔係求其嫁個外國人然後完全唔諗住融入乜乜乜(我唔係話嫁娶外國人有問題,自由戀愛,絕對無問題。但的確有好多亞洲女人係咁,嫁走咗就自以為’upgrade’咗離開佢哋本身嘅窮國。香港女人唔洗做到咁,不過呢個唔係主題,所以下略,費事有人借題發揮啫)。
