移民德國?我都係你同鄉喎

Ladykylie

其實個標題唔係太對文章入容,但吸咗你入嚟先啦。今次主要係分享過嚟德國嘅心態/準備同經驗。

Munich, Germany

咁講啦,我有個朋友嘅朋友係德國讀緊Master。
佢係已工作人士,辭咗份工,用自己積蓄一個女仔隻身過嚟,唔係working holiday, 亦唔係父母比錢佢來讀書果種。

佢住咗年半德國,又住過唔同州,覺得德國人比想像中唔open-minded,難識朋友,覺得一個人有啲難捱,所以佢好奇我對德國人嘅mentality有咩睇法同點應對,同埋點解會揀德國。

本來我都已經想寫啲關於由香港過德國嘅相關,或同大家講如果你地都去其他國家、去之前嘅事前準備/評估,同埋申請證件嘅經驗,只係未有時間整理。咁就趁呢個朋友嘅問題,先公開小小睇法同經驗,日後會再詳細分類出文。

註:我從來無係個page度講以下堆野,一來未知自己想點整理呢埋嘔吐物,二來有啲人睇啲唔睇啲會以為我係度話自己好慘,繼而又話「唉,我都想去外國住啊,你走得到仲多多怨言」。我個開場白長小小,就係想先洗走呢啲睇一忽唔睇一忽嘅人

另外:以下會提到好多關於德文程度嘅問題。呢篇文主要唔係講學德文,但先簡單講大家知,等大家有個概念。

德文分三個主要Level (A, B, C),A係初,B係中,C係高。
分級大致為 A1 > A2 > B1 > B2 > C1 > C2
(去到B2其實已非常高階,流利溝通同睇得明大部份報章雜誌。不過大部分入大學同工作等嘅標準係再高一級嘅 C1。而C2好少人會去考,多數係做教師/寫作或者語言迷。)

===========

「一個人」嘅難處

先講有啲人覺得「就算係父母比錢,都係自己一個人過嚟」,但同長大自己搬咗出去住嘅成年人(亦唔係working holiday離家一年有地方返)其實差好遠。
十幾廿歲過嚟,有同年嘅同學,亦有父母經濟上支援:最少住屋學費係父母支出,就算無生活費,要自己打工賺生活費嘅,亦已經相比容易太多。而絕大部份父母供去外國讀書嘅都會比埋生活費。比起長大先動身,攞住自己工作儲嘅積蓄再辭咗份工過嚟,間屋要退租,搬到過德國嘅野有限,要賣走好多野(我啲二十年珍藏絶版漫畫一套套賤賣!);一邊要睇住啲洗費,另一邊又明知自己已經唔係十幾廿歲,學語言多數無咁快上手,亦唔知讀完之後留唔留低好、搵唔搵到工做、又要煩係到或者返香港無地方住要搵屋、返到香港點算etc,需要嘅準備/決心同budget係差好遠。

無論咩年紀,學一個全新嘅外語有一定難度,首先建議:

如果大家決定去非英語國家,最好出發前一兩年先學吓個語言。

係,十幾廿歲學德文一定快啲。(我都想十幾歲就過嚟,但十幾廿歲邊度攞幾十萬出嚟呀,無父幹唔洗諗。咁咪自己供自己囉)

一個人嘅難處,如果你揀咗個非英語國家(假設「正常」香港人去到英語國家其實無問題),除咗要應付好多語言上嘅問題,啲證件/保險/政府部門信勁難睇,有咩都無人問,或者咩都要搵人問。我自己好彩係一直有好多歐美嘅朋友,就算當地無直接朋友,都有朋友個朋友。佢地係一定程度上幫咗我好多野,但始終唔係伴侶家人,好多野最後都要靠自己處理。

有人話,見住有啲人跟老公/老婆/男友/女友過嚟,唔使自己一個安排錢/住嘅問題,已煩少好多;有啲人係公司調佢地過嚟,佢哋都覺得辛苦。但事實公司調過嚟,即使要適應新環境,已經煩少咗搵工甚至住屋(好多公司調員工去第二個國家要幫佢地搵埋屋)。

咩都無攞住舊積蓄過嚟,一係比人話你好勇,一係就比人話你好犯賤自己要過嚟。

我無故意去build一個network,但生活習慣同圈子造就咗個network。

所以識多啲人同睇吓你去嘅地方有無朋友又有朋友亦係一個方法。

===========

有人幫,易好多

呢位朋友提到,有另一半,係呢邊會容易好多。無可否應,有另一半而另一本係本地人,一定會易啲。因為你已經唔係「一個人」。

但係其實我最初都係一個人(後面再詳細分享小小)。

之前我嘅工作長時間,高要求,壓力大。只係搭車來回,一日已經差唔多四個鐘。Munich住屋競爭太大(唔係香港先有),搵唔到地方搬,放工散曬仲要同啲又自私又污糟嘅house-mates住走唔到,真係慘過乜,我之前無係個page度講,因為實在唔想公開訴苦,好彩已經係過去式 ( Thanks God!!! )

人在外國要搵屋同轉工,實在難過係自己地頭好多倍,呢個我諗唔洗解釋太多。有時覺得真係乜都要自己一個人頂,冇人Support,的確係好攰 。

係,有啲人跟男女友/老公老婆來,唔洗煩住屋/錢/證件,或者煩少一大半;但你明知自己唔係跟另一半過嚟,就要預咗自己要諗方法解決,人哋嘅野人哋嘅事。只係就算本身個人性格獨立,遇上問題都係會傍徨,尤其當你當地語言未去到好好嘅時候。中間好多次我覺得應該去英國,起碼你用少好多時間係語言上面掙扎。

但我覺得可以唔靠人,自己過嚟其實係好事。啊Q啲囉。學外語,體驗生活,係有要適應嘅地方,但適應到就會慢慢變好。有人幫當然係事半功倍,無人幫一定係辛苦啲,但有網絡好多野都可以問人,有心其實搞得掂。

有樣野係,我一方面認為海外港僑要守望相助,一方面又要融入當地所以唔應該故意去識一堆「同鄉」。攞個balance 好重要。(我話港僑,係講海外香港人。認中國人果啲我唔當佢地係香港人,去同佢啲同胞煲冬瓜啦,唔好同人講你係香港人呀)

===========

德國人唔係想像中咁開放?

德國人唔係想像中咁開放呢個問題,我估好多香港人都會有。
因為好多香港人覺得歐美嘅人一定開放啲,或者佢地亦只接觸過係香港嘅歐洲人,嚟到香港就自然會自動調節咗小小,同呢邊「真正」歐洲人係兩回事。情況有啲似傳統菜去到外國,要調教到啱本地人口味咁 XDDD ……

我自己算多同歐洲人接觸,成長環境都有歐洲人,係香港時一半以上都係歐洲朋友(但我離港前兩三年,其實啲歐美朋友都走得七七八八,連香港嘅朋友都好多離開咗 :-( … )。自己到工作年資多咗經濟好啲,就儲錢一兩年嚟歐洲一次探朋友,因此正式搬過嚟之前已經有好多印象,唔係無端端過到嚟無所適從咁。

所以好緊要係想去一個地方生活之前,係好應該去「探路」,睇吓、感覺吓啱唔啱自己。

(另外如之前講,如果你去嘅國家嘅語言唔係你本身學開,咁你讀啲基本先去,唔好諗住去到會自動識或者去到先由零開始學。我係反面教材XDDD 你會好忙,一次應付咁多野,散㗎。)

我唔可以講我好清楚某一國嘅人,有啲人住係度廿幾年都唔知,我覺得自己係香港人有時都好唔清楚香港人,所以對德國人嘅Mentality評語只係我嘅印象,不能作實 XD。

普遍嚟講,個人認為香港嘅英語/國際圈子比呢邊大部份大城市(我都去咗好多個)開放,唔係講性開放果種開放,係睇法同埋想識多啲唔同朋友果種開放、外國人比較容易生活上融入果種開放。

呢邊所謂國際嘅圈子極細,有啲咩networking都係大家想睇吓有咩著數(搵工聯絡/男女朋友),唔係好似香港甚至Bangkok咁,好多唔同國家嘅人一齊想認識對方做朋友出去玩。我有個亞裔朋友住咗Hamburg六年,佢德文已過咗C1九世,都話德國人的確係返工放工加自己家庭朋友。唔同歐洲人去亞洲,本地人想同你做朋友,呢邊個個都收埋自己。我嚟之前已經知/有心理準備係點,同埋我第一次嚟德國係成八年前去Köln(科隆)探我好朋友,所以已經有啲實質印象。但住耐住小小都開始明白有好多人話難融入果樣野。我融入方面已經好過好多「同年資」嘅亞洲人,但都仲有耐要磿。

講融入同open-minded 其中一個難處但亦係可以開個話題嘅就係:佢地對亞洲嘅認知其實好少。我哋中學要讀World history, 佢地如果唔係主修History好多都係中學讀到戰後現代史,連歐洲歷史都唔算太清楚(當然,精果班係精到不得了),對亞洲就更加覺得係一餅野,咩都以為係中國入面,我次次識新朋友,講到「我來自香港」都要由頭解釋過咩事,點解香港其實唔算係中國嘅一個城市,而只係政治上被操控嘅鄰近領土,點解香港同中國用唔同語言,台灣唔係中國(呢邊政府寫係㗎,香港人見德國領事館個page出抽水圖就打飛機以為德國人好關心清楚香港,其實個page都係香港人做admin,搵個人譯幾隻字咋嘛。。。。)

但係我覺得佢哋政治討論方面都幾open-minded,大部份德國人係會聽我講曬呢堆野,認真發問,無/少出過國嘅都係咁,所以我覺得係睇話題。如果你啱傾,佢哋拉住你成日,講到你唔想講,仲煩過乜 XD 。其實德國人好鬼中意講野/討論,但係只限用返佢地自己德文。好多德國人英文唔太好(我接觸過好多本地人係幾句都無,或聽得明一半都係用返德文回你,唔係佢地唔想,係佢地唔得,非不為也,是不能也-相比吓好多「正常」香港人英文好過好多歐洲人),或者英文好嘅都係覺得講英文無咁舒服,呢個係我印象。所以我話如果你德文去到「非很常好」,搵啱話題去吓啲meet up group都會識返啲有共同興趣嘅朋友,而唔係好似香港咁去LKF飲兩杯下次出嚟又係飲兩杯之後就去junk trip果類嘅社交生活上open-minded/easy going…

但自己其實亦要adjust小小,多聽人哋講乜,吸收多啲先開口。對於德國嘅野,我聽佢地講多過表達。吸多啲先,學吓野,唔認同唔洗講出嚟,除非你自己覺得你比佢更清楚個議題。

講返普遍歐洲人,出過國唔一定開通啲,未出過國嘅亦唔一定封閉啲,阿媽係女人。但基本上我覺得法國人又好德國人又好英國人又好其實都係一定程度保守,保守又唔一定係負面,而家歐洲個局勢係需要一定嘅保守。咁我覺得只要你做返你應做嘅:奉公守法,學本地語言,唔好成日收埋自己多啲同人溝通,笑你話你一件事唔好怕樣衰繼續上,咁佢地open-minded與否,你做好咗自己果part就得,反正你控制唔到人地,只能夠提升自己。自強不息咁囉。

小結論係,我覺得香港同歐洲(唔用「亞洲」同「歐洲」係因為香港同其他亞洲地方太有分別而香港人不自知)係兩種唔同嘅保守/開放。

=============

搵工/識朋友/Networking/點解揀德國

呢個女仔本來住鄉下地方,最近搬返出市中心。佢話有過德國flatmate,但佢地都係閂埋房門唔埋人。

首先-----由鄉下地方搬入城市係正確舉動!!!!剛過嚟,唔好住太偏。比多小小錢都要住城市。鄉下地方可以結婚後住,生兒育女或養老,但仲後生想搵工讀書同埋仲係融入階段要住城市。Flatmate/house-mate 如果係德國人自然唔會理人咁多-佢地本地人有自己朋友家庭,無需要去識外國人,有啲中意外國文化想識朋友嘅德國人,但唔會係大多數,呢個係正常。如果flatmate都係其他嚟德國工作讀書嘅外國人,反而就會做到朋友。但首要係相處得來。好似我之前嗰兩件影衰日本嘅污漕自私house mate真係走都走唔切(唔知咩事嘅睇呢度: https://link.medium.com/wmffIuYs6T )

如上述,我之前住度有其他國家house-mate,但好多都走咗去第二度讀書,咁我想識啲都係返工做野嘅,就去啲 career networking。Networking event對外國人嚟講好,尤其外國人係德國除咗讀書返學,空餘嘅所有時間都幾乎只能用嚟學德文,唔靠呢啲networking,基本上唔會識到人。不過去嘅都係少德國人,理由同上一段一樣,佢地已有自己圈子/network,唔使靠呢啲識人,除非有公司想物色外國人做有關外語嘅工作,但都好少,因為佢地成日收好多外國人CV,都睇唔切。我最初都係搵工所以去呢啲networking,但最後有工返都係靠自己係德國求職網站狂send CV, 狂interview,wer爛塊面狂sell自己。搵工心得我唔算多,始終每行唔同,我嚟咗兩年幾暫時只係做過一間公司,而家都係搵緊新工同進修啲德文。

點解嚟德國好長篇。好多人係因為學費平,但前提係你德文要讀到一定程度先有書讀 – – 語言學校唔平,但都有價錢合理(本地VHS、Axioma etc.),但香港有中心可以報名去德國讀嘅language school 就最好唔好報,價錢四倍嘅學店。總之你想讀平價優質大學,學德文考試果度嘅錢同時間,其實已經係大投資。

個人嘅話,簡單啲講我由好細個已覺得自己唔會一世住香港,中意歐洲但未知自己想去邊個國家。小學時已好中意睇希臘神話,天文地理歷史都係歐洲比較吸引,又好細過已中意法國/意大利啲油畫,而本人極老套最愛係The Renaissance時期嘅野,第一次嚟歐洲探朋友都係法國意大利先。但覺得自己個性比較中意多啲條理守規嘅地方。中學時睇好多英文同翻譯小說,主要都係英國文學同德國哲學,孔孟老莊唔係無睇,但睇完都係整體中意歐洲嘢。長大工作儲錢少shopping,有機會就返歐洲去唔同國家探以前係香港識嘅歐洲朋友。我好多法國朋友,所以試過讀法文,但覺得語言上興趣不大。而德國係我其中一個我去完覺得生活會唔錯,我又對佢個語言同文化有興趣嘅國家。又心諗如果學識德文可以睇尼釆/叔本華原著德文版 – —我中學後睇咗尼采一大半書,康德叔本華散住睇,但都係睇中英文翻譯版。我已睇咗卡夫卡「變形記」德文版,中學時都係睇咗翻譯本咋。文化上比較近德國。本來想去大英祖國,之前亦有工作機會,但覺得英文已識,不如去學外語(自虐⋯⋯)又因為第一次想動身係2012年反國教,唔捨得「扔低香港」走,第二次係2014雨傘革命,覺得最後機會要搏,兩次都無走到。我個心一直想行但無郁,等到2016年真係天時地利人和先行。另一個原因唔郁係因為:我係夏天撚,好憎冬天,係香港已經憎,長住呢邊我會掛夏天掛到傻。但好多時啲野整定。我個ex都係德國人,係香港某私人銀行做律師,佢因家事要返德國,當時我亦想完成多年心願到歐洲生活學外語,而且對香港覺得好無力,亦已對被啲losers起底造謠人身攻擊覺得好疲累,見香港人對政局種無知、天真同潔廦好心灰,加上好多私人/工作原因,就攞住舊積蓄自己過嚟搏一搏。個ex唔係唯一原因,但佢的確係推動力。但基本上佢無幫過我任何野:由我決定搬過嚟到我正式落腳中間亦有不少爭執。所有證件、簽証、住屋、學校、工作全部我自己搞,基本上一返嚟Munich就飛咗佢,因為佢話只想拍拖唔想要細路又唔諗結婚,我話咁不如分手,因為我唔想浪費時間(我好中意小朋友!)佢喊曬咁,我都唔好受,但勉強無幸福,無謂浪費大家時間。太私人嘅唔講太多,大概係咁 :)

咁我最初只focus讀德文幾個月,後來覺得學得太慢,自己又有工作經驗不如做吓野,一邊讀德文一邊睇吓有無工作機會,讀到B2頭,有公司請(B2都未考唔夠搵工㗎,大家真係要讀到C1, 我係因為有好嘅portfolio同以前做大公司+個老闆同HR in完好中意我),就即搞work visa返工。同埋我唔係完全無Planning咁過嚟,我出發嚟讀德文前,有個以前大公司高層嘅德國上司話可能可以介紹我佢朋友係Munich間公司做,咁我諗住讀完個course可以一試,但最後佢朋友公司無回覆,我又自己搵到工,所以就返咗第一間公司。

呢邊搵工真係好難,請咗你都做到扒街。扣埋稅其實我搵得香港人工嘅一半!!!!只係我個心已經覺得我出生成長嘅香港已一去不返,我亦都唔想走回頭路,咁搵到工咪做囉,如果係為錢我唔走啦。生活到就得嘅心態。再留係香港我會傷心死。我做間本地公司二百幾人,有所謂外國人都係奧地利同瑞士嘅同事(全部德語區),總之公司得我一個係外國人,有啲同事幾nice,有個女仔做咗好朋友,可惜佢返咗自己home town(德國中部)。我都想再識多啲朋友,其實我好多朋友係歐洲人返咗自己歐洲嘅home town,但無幾多個住同一個城市/國家。有啲同事就勁賤,成日串我德文差,尤其啲妒忌人嘅女人,會講啲類似”Was sagst du Kylie? Ich verstehe nicht wirklich was du meinst. Deine Deutsch ist nicht so gut, Weißt du das?” (你噏乜啊Kylie? 我唔係好明囉。其實妳知唔知啫,妳啲德文真係唔係幾好囉)咁嘅野。我淨係知我幫公司做咗勁多野,如果我德文真係差成咁根本做唔到佢哋啲project。同埋大佬呢個係我學嘅第5/6語言,學咗幾個月就嚟返工,同你地德文母語比可以有幾好?鬼叫你個老闆見完我中意要請我?吹呀?佢哋唔會明白,呢個情況同佢一個德國人自己一個去日本讀日文,然後去間只有日本人,開會/email/日常溝通/電腦interface/所有野都係日文嘅公司做野一樣咁具挑戰性 XDDD 簡直係lost in translation啦。佢唔明亦無需要明,我迫自己做好啲,呢啲只可以吞咗佢。對佢地嚟講我只係一個犯賤嘅人係要走過嚟做野 XD 我唔理,忍辱負重,攞多啲經驗先。德文唔夠好但有實力搵到工做係我唔啱囉。唔同歐美國家嘅人過亞洲可以講英文就掂,不過呢個太複雜先唔扯開。

當時我每日搭車來回都用咗四個鐘,我計過,車程係日日羅湖搭車去香港仔嘅距離,再加零下十幾度大風雪地行25分鐘,我成日覺得自己會係暈倒雪堆入面凍死。朝早日日五點起身夜晚十點幾到屋企,幾個月無見過個太陽。份工又忙,加埋啲仆街污糟house-mate,真係攞命呀。屈咗成年係咁搵地方最後都係因為德國朋友先搵到地方搬。本地人已難搵屋,外國人係度難上加難,有啲PK又專劏人,呢個下次另文再述。

我呢個月尾會考C1,預咗唔得,但要係度長住有一日一定要搞掂佢。

我覺得如果唔係對德文有興趣或者因為某啲原因要揀德國,香港人去返英語國家會好好多。

– —起碼你可以用你學德文嘅一星期幾十個鐘做其他野。尤其年過25, 廿尾三十頭,要學一個新嘅語言,仲要複雜成咁,真係好攞命。我本來諗住搵唔到新工就去疊埋心水去英國,但大家應該知我被人妻,所以選擇留底繼續同啲Der die das den dem dessen daran 糾纏。XD

如果你自問真係好中意德國同德文,咁就揀德國/留底啦。

另外嚟咗德國之後,英文真係甩咗好多,好多時用咗德文文法講英文,同音錯別字,廣東話同英文都發生。所以我寫多啲廣東話,同埋不停同London/New York嘅朋友傾電話。

已經係德國Working Holiday/ 讀緊德文/大學嘅朋友,我鼓勵你哋如果真係想順便攞工作經驗,就多啲去見吓工。就算你唔想長住都試下。我諗起以前有間公司幾個同事係英國讀咗八年書,啲英文屎到無人信,我同啲外國客、上司吹水時佢地口啞啞,同香港同事一齊時佢地就係「回流精英」。呵欠。但呢啲人一話比香港老闆聽十八歲過英國讀咗八年書,返到嚟自動人工double。所以我話你真係唔諗住長居德國都真係試吓搵野做,係呢邊讀過吓德文加做一兩年工,返香港會吃香好多。

-----

大致上係呢啲分享。

如頭一段講,我日後會再詳細分類寫德國工作生活證件etc。

如果而家唔夠喉,大家先睇呢兩篇, 睇完記住入去like (自毆
https://link.medium.com/LCm8L6RG6T 德國第一年(2017年文章)
https://link.medium.com/lbjvg12G6T 【再見香港】(2016年文章)

大家睇完請拍手支持!咁我先有動力寫啲申請證件乜乜乜嘅野 XDDD

Welcome to a place where words matter. On Medium, smart voices and original ideas take center stage - with no ads in sight. Watch
Follow all the topics you care about, and we’ll deliver the best stories for you to your homepage and inbox. Explore
Get unlimited access to the best stories on Medium — and support writers while you’re at it. Just $5/month. Upgrade