最近見好多人都半帶玩笑咁Share「日本節目研究:從你的字跡看出智商 寫字愈醜樣的人愈聰明!」呢段報導。字醜同智商係咪真係有關呢?我唔肯定,但我肯定字係可以練返嚟,而且寫到靚字仲係一件開心嘅事嚟㖭。因為我就係人辦。
不過等我戴返頭盔先。直到今日我都唔夠膽話自己手字靚,只可以話手字係由「災難」變成「見得吓人」。同埋我只係有練英文,我手中文字依然可以話係慘不忍睹。
以上就係我廿幾年人一直寫開嘅英文字。當然視乎書寫速度,有時寫得好啲,有時會潦啲,但整體上都係唔靚。
但點解我會無啦啦想練寫字呢?事源係因為一位好朋友練咗幾年英文書法,見佢寫得一手好字,自己都心郁郁想試吓。加上佢推波助瀾,又提供意見,又教我買筆,於是我就喺2014年到開始嘗試練吓字。所以話,好朋友真係應該要互相砥礪吓㗎。
我買咗枝Lamy Safari,一盒Lamy墨(到而家都未用完),仲有一枝可以重新裝填嘅Lamy卡式吸墨管,然後就開始我嘅練字旅程。
當時我就係咁拎住支筆,揭開本簿,將我拋低咗十幾年嘅潦草由腦海硬生生搬上白紙,個效果係點可想而知。好可惜我已經搵唔返頭一兩本練字嘅簿,如果唔係大家一定會嚇親。嗰一排我會每日都搵啲嘢嚟抄吓 — 抄吓名人語錄啊、聖經啊、英文詩啊等等,日日如是,從不間斷。有時會練吓畫圈圈,或者係咁寫個細階L字,寫到成串彈弓咁。不過個目的都係為咗訓練隻手嘅肌肉去習慣呢種移動方式。
可以畀大家睇吓早期嘅筆跡。
你會見到啲字雖然係intelligible嘅,但好明顯係唔整齊。譬如字底唔貼線,斜度唔平均,字高唔一致,字闊亦唔一致。呢啲都係令啲字睇落唔整齊嘅原因。
咁點樣練整齊啲好呢?有個秘訣,就係寫慢啲。寫字普遍嚟講都係愈快愈潦嘅,想寫得一致,就由慢練起。同埋最好唔好淨係用單行紙去練,要用吓一啲有ascending line, base line, descending line嘅紙去練。又或者用小學嗰啲英文簿練都得。
如是者,一直練,後來又停咗好一段時間,近排又再開始練,都總算有啲成果。
係咪好靚呢?其實唔係。上面呢版啲字寫得偏窄偏細,唔夠氣勢。有啲地方依然唔夠一致。但睇落起碼舒服過之前好多。
除此之外,近排都有探索吓用粗筆尖(Broad-nib)嘅鋼筆寫吓Italic書法。效果都幾令人鼓舞㗎。
其實練字喺今時今日絕對唔係一件有效益嘅事嚟。上一代老闆都仲可能會以你手字去判斷你個人。但今日乜都係用電腦打字咁滯,又幾可要親手寫字?但係又正正因為咁,今日練字嘅動機可以變得更單純。點解想練字?靚囉、開心囉,仲唔夠啊?
之前見 阿擇 (Chaaak)寫咗篇文講無力感。其實我覺得喺練字當中睇見自己慢慢進步都係一個幫助自己消減無力感嘅好方法嚟。當你發現自己可以將廿幾年嘅「災難」變成「見得吓人」,或者其他大事都可以一點一滴咁做到呢?
下次有機會再詳談練字嘅心得。