講搵工
是咁的，我都大學畢業喇，咁搵工做都好應該嘅。但係，都知道我而家做住份補習社，我點搵工呢？
我自己就諗住過英國working holiday，最快12月去，七月左右先返嚟。其實就係呢個諗法戟住咗我，因為一嚟咁搞法我呢幾個月會冇錢，二嚟我咁搵工亦都唔容易。
點算好呢？其實我真係有諗過直接踎幾個月躉嘅，但係個問題係，我咁做會令我彈盡糧絕。（9/2018嘅銀行戶口結餘話俾我知，我兩個儲蓄戶口夾埋$30k，當中萬五蚊因為銀行戶口政策唔郁得，本人最慳咁使都只可以用三個月。）
咁，冇錢咪搵工囉。但係，我又唔覺我想做嘅工會俾我做兩個月嘢然後出去半年先返嚟繼續喎。所以我又只可以搵我未必好想做嘅工。
臨時工嘅話我又驚佢壓價喎。同埋都大學畢業喇，唔通仲炒散？有冇人會理你㗎？
好似會有，不過又好似要有reputation先。唔做嘢又點有呢？我又唔係Taylor Swift隻碟。
唉，咁都係算喇。總之我就唔想喺補習社過成世喇，所以我就一定會出國嘅。
本身我就都諗住23/8喺補習社last day㗎喇，點知嗰日病咗（去完臺灣玩之後食滯咗），要請假。呀頭之後叫我1/9返埋。
嗱，我就諗住係呀頭廢事改張支票先叫我返埋，本身就諗住當last day，然後拍拍籮柚走人㗎喇。話哂都喺嗰度留咗四年，點都係時候走。
點知1/9開工，呢日係補習社嘅開學日。呢一日我俾事頭婆開大技留多咗我幾個月。
咁由於我呢個做咗幾年嘅人都叫知道呢一日要點運作，所以呀頭冇叫到我都自動走咗去攝位。今年我攝著送細路入課室嗰個位。帶下帶下，事頭婆走到過嚟。佢首先都話好開心仲見到我嘅（其實都好行貨㗎咋呢句，一係見一係唔見㗎咋嘛）。
其實咁，我呀頭同事頭婆係親戚。所以我要去英國working holiday呢個消息好快傳到去佢度唔出奇。然後，事頭婆就展開攻勢喇。
「Anthony，你幾時走啫？」我都係第一次聽到有老闆問員工幾時走。
「吓？最快都12月先走㗎喇，我諗住過埋11月畢業禮先。」
「咁諗住搵咩工呀？」
「我都未諗定呀。」其實就諗定send email返去之前intern嗰度睇下有冇得做下先。同埋最想就係搵到份教廣東話嘅工。我自己已經keep住咗堆寫住有教粵語嘅教學中心喺自己嘅電腦同iPad度嘅。
呀事頭婆跟住就同我講，話佢有D學生喺英國嗰邊做緊嘢，話可以幫我聯絡佢哋，睇下佢哋有D咩好工介紹下之類。咁就算我自己都會搵，但係有多D人幫我搵（真係肯嘅話）梗係仲好喇。所以我當然話好。
「仲有呀，你中學個呀sir好需要你幫手呀。嗰邊呢，編班嗰陣禮拜二三班班都十幾廿個人，好需要人去救命呀。禮拜二三呀，諗諗佢。」
公司policy：每班多過12個學生就醒個TA俾你。雖然我返去讀書嗰陣我見到報稅表仲係寫住我係tutor（點解我全職大學生都要報稅同交稅，唉），但係我都成日做TA嘅位，幫隔離中文數學嘅同事，而英文科我好少要教，除非講咗本身教嘅同時唔喺度。
另外，我有個中學呀sir輾轉間去咗我做嘅呢間補習社教書。而公司上下好多人都知呢件事，尤其係高層（雖然佢係我呀sir呢件事係我爆嘅）。
「我考慮下。」我講。我最初頭就諗住，話考慮下之後就hea佢話都係唔好喇然後就呢日last day走人。但係諗下諗下，又覺得，我都冇錢，做多排都冇壞嘅，係唔好做到好似full time咁就得喇。
咁呢日做完所有嘢之後就同呀頭傾下之後嘅安排先喇。就算我last day都要同人講㗎。
「喂你幾時飛啫？」連呀頭都咁樣問我。
我唯有重複個答案。然後我加多咗句：「咁今朝呀事頭婆就同我講話我呀sir D班就好多人，成十幾廿個咁。就叫我禮拜二三過去幫手。我覺得都ok嘅。」
「唏，咁你都計好哂數喇。你都知我哋呢邊禮拜五六特別忙㗎喇。一於就咁，禮拜二三就借你出去你呀sir度，禮拜五六你就返嚟呢度。禮拜四你學法文就唔阻你喇，禮拜一俾你放假。咁就啱哂喇，係咪？」
好喇，就咁。不過我呀sir嗰邊返放工時間同平時呢邊爭一個鐘。
之後個禮拜二返工，就知道我中伏喇。我唔係幫我呀sir手，係幫另一位同事手。而我對嘅呢屆學生，就係我啱啱嚟到呢間公司嘅第一屆教嘅學生。
OK嘅，去咗第二個部門幫手，佢哋個做法可能有少少唔同，但係熟咗就冇問題。所以我喺呢邊即係要多少少時間啫。
然後呢排事頭婆見到我，就問我去嗰邊嘅行程，等佢可以幫我手問。咁我都係講番返個實際情況俾佢聽。
「OK喇，呢D半年嘅都算短期㗎喇。咁我幫你搵住宿，同埋做咩工都得㗎嘛？」
「係。」
「咁我幫你搵埋喇。趁後生出去闖下都好嘅。」
我諗，如果我事頭婆搵到哂呢D俾我，而我最後又去得到英國working holiday嘅話呢，我年尾份散水餅會搵D好D嘅。
