[集思廣益]香港連日嚟嘅事件應該叫咩名好？
六九事件？六一二佔領？遮打革命/雨傘運動2.0？
當年2014，有外國記者喺香港影到有個人喺催淚彈D煙之下舉起咗把遮，就叫咗呢件事做Umbrella Revolution。
但係去到2019年，對於今年嘅一連串事件，我哋係咪都應該要同佢改個名？就算香港史/中國史唔會提到，我哋係咪都應該要俾個名佢等外地人幫手寫返出嚟呢？
我睇到好多地方都係叫「示威」、「示威」、「示威」咁樣，真係冇其他名喇咩？
臺灣嘅「汗語字典」有人投稿出咗呢個。
睇嚟，有人想學當年臺灣「太陽花學生運動」咁改，想用花。所以就有人用香港「市花」紫荊嚟改名。
當然，係香港人就會知道，紫荊花根本唔係香港市花。香港市花叫洋紫荊，係宮粉羊蹄甲同紅花羊蹄甲嘅混種。
之後睇到，原來係本身有地方一早寫錯咗（我懷疑係有人特登嘅），所以大家跟住錯都好正常。
所以呢，一嚟香港人應該唔會接受「紫荊花運」呢個名，二嚟我哋應該要教返全世界我哋嘅花係洋紫荊，同紫荊花係唔同嘅。教返人呢樣嘢係大家都要幫手。
咁今次叫咩名好？
我建議參考返幾廿年前同樣係有人入侵香港嘅嗰場戰役：香港保衛戰。
當年，係軍國主義嘅日本喺東亞擴張，入侵香港。雖然香港打咗十幾日就頂唔順要投降，但係呢一場戰役絕對令到我哋記住香港喺嗰段時間嘅艱難。
今次，共產黨打到嚟喇！喺我眼中，共產黨直頭係同全世界宣戰。我哋再唔做D嘢，我哋香港真係會俾佢哋吞併㗎喇。到時共享中國人的榮耀就GG㗎喇。
係㗎，叫「戰」係好得人驚㗎，如果因為呢個字共產黨開坦克入嚟就真係好恐怖喇。但係記住，全世界睇住㗎而家。雖然英國無乜腰骨，佢哋都應該唔敢得罪中國（我唔明），但係佢哋公然違約嘅話，我相信佢哋會得到國際制裁，到時應該勁過貿易戰。
所以，喺香港嘅朋友，我好多謝你哋嘅付出。比著我喺香港，我知道我都唔會出去，因為我都好清楚我自己唔夠勇武，都好擔心自己會出事。所以好對唔住，但係都好多謝你哋。我做得到D咩我會盡量做，我做得到嘅係文字嘢，所以我識做嘅我會盡量做。
香港一定要加油。
