如果香港要支新旗
多謝Lyndon Chai’s
早排G20峰會，好似有香港人去咗日本聯同西藏同新疆人開咗個記者會。睇圖，我見到新疆有東突厥旗，西藏有西藏旗，香港呢？黑色一塊，寫住香港。
然後，有一晚（英國時間六月三十號）碌碌下Facebook，俾我見到有friend share咗呢個post出嚟。
以我當晚睇到嘅嘢，都係班連登仔鐘意一支藍白色bicolour嘅旗，左上角仲有一朵洋紫荊。
然後D人又喺度嘈話嗰隻係殯儀藍唔老黎，唔好用呢隻色。不過其他嘅idea又冇乜點俾喎。
不過都好好，有人提過一支旗應該要點設計先至好。佢哋就講，要細路仔都識得畫嘅簡單設計先至係最好嘅。
係呀，佢哋都好想有個簡單嘅設計，所以話個洋紫荊要用市政局嗰個design（當然用洋紫荊都有爭議喇）。
另一個重點就係，揀得用一樣嘢上支旗度，就一定會有佢嘅意思喺上面，最簡單，顏色通常都係有意思㗎。然而，我睇到佢哋對兩隻色嘅意思都好似冇乜特別講。
不過我覺得，佢哋跳唔出雙色嘅框框。所以我決定由佢哋雙色嘅框框跳去另一個框框：三色旗。
我會叫呢支旗做「港九新界旗」。
首先，支旗嘅比例係5:3，跟英國。比例跟英國原因當然係因為同英國嘅歷史喇。無論如何，歷史呢樣嘢唔可以俾人亂改。
跟住係嗰三隻色，其實呢三隻色有兩組意思，我逐組講，第一組簡易版講先。
簡易版囉喎，藍色（英國旗藍）代表香港島。海島自然用水色。
啡色代表九龍，人煙稠密嘅地方，望到嘅景象通常都偏啡嘅。而啡色亦都係獅子山嘅石嘅顏色。
綠色自然就係代表新界呢個市肺。而且，好大面積嘅郊野公園都係喺新界，所以講起新界好多人都會諗起綠色。
另一方面，呢三隻色亦都代表緊香港嘅天然資源：綠色代表植物，啡色代表礦石（我呢幅小畫家劣作搵唔出邊隻係赤鐵礦嘅紅啡色），藍色代表水。
其他可行嘅解釋包括（亦不限於）：
- 綠加啡係一棵樹，藍色係水，夾埋即係海（島）上面嘅一棵樹。表示香港係各地嘅連接點（有冇睇得自己太高？），而且係大家嘅救命草。
- 三種顏色其實係「和平理性非暴力」嘅代表色（配得啱嘅話）。
- 啡色係Geography Now嘅老梗：Blood for those who fought for the freedom，只係香港揀偏啡色而唔係紅色。
另外，仲有人講起個徽。
其實以我睇咗Geography Now幾年嘅記憶，我睇到通常都係個徽先至玩detail嘅。所以呢，D咩嘢洋紫荊、老虎岩、帆船、雨遮等等嘅麻煩嘢應該係喺呢度先擺返哂出嚟嘅。
唉，篇文拖得太耐拖到元朗獨立咗都未出㖭。😅
