從「玩」寫成「挽」顯示香港粵語嘅聲調合併

我都係讀大學先知有呢一回事

好多人都知道粵語有九聲六調，好鬼複雜。但係唔係好多人知道語音係每個語言最易變嘅部分。甚至話，有D人根本唔知語言係會變嘅。

首先，九聲六調已經係語言轉變嘅結果。

一直D人都話粵語承傳自唐宋時期嘅中古漢語，但係當時人哋都只係得平上去入四聲。經歷咗「濁音清化」就同時分埋陰陽，即係呢步之後就由四聲變八聲。例如台語都仍然有八聲（都有說已經變咗做七聲）。

其實，好多中國語言都handle唔到咁多聲，所以之後嘅演化就將D分開咗嘅聲合返埋。

以官話為例，而家嘅四聲其實只係陰平、陽平、上聲同埋去聲。即係話平聲仍然分陰陽，陰陽上聲同陰陽去聲都已經合返埋一個。

不過唔一定係同一種聲嘅陰陽合返嘅，亦都有教授講過有D地方拼埋兩個陰嘅聲，例如陰上同陰去聲合併。

咪住先，官話嘅入聲去咗邊？

冇錯喇，演化嘅時候可能會冇咗一忽。冇咗嘅部份唯有好似分豬肉咁分咗佢。例如一字俾咗第一聲，學字俾咗第二聲，角字俾咗第三聲，同埋不字俾咗第四聲。呢個係官話嘅做法。

粵語九聲喎，仲多咗嘅？

我用最簡單嘅方式講下：當時演化嘅八聲不單止冇合併返，陰入聲仲要因為元音嘅長短拆咗做兩個出嚟。所以變成九聲。

不過六調又係咩呢？

粵語通常分聲就係跟呢個次序嘅：陰平、陰上、陰去、陽平、陽上、陽去、上陰入、下陰入、陽入。跟住讀數字「三九四零五二七八十」就齊哂㗎喇。

不過讀真D，你會發覺「七」拉長同「三」一樣，「八」拉長同「四」一樣，「十」拉長同「二」一樣嘅。呢度一樣嘅係個音高，或者話係調值。所以第七八九聲與其分開擺，不如將佢哋擺哂入第一三六調入面，方便（現代人/外語學習者）處理。或者話，粵語入聲已經完美分咗入陰平、陰去同陽去聲度。

亦即係話，讀音轉變一直都有。咁「玩」同「挽」讀音上唔識分都係正常現象嚟。

請試下（叫人）讀呢六個字：

詩史嗜時市事

如果你搵到一位仁兄有D字讀唔出有分別，仲要聽唔出嗰D字有咩分別。恭喜你，你搵到個有聲調合併嘅人喇。