為咗方便人睇（同埋最重要係方便自己寫），以下嘅後記會全篇用粵文寫。
好似寫後記之前都要介紹下自己先：
九十後港女，筆名明晞。除咗明晞之外，我仲有用其他筆名寫文，但呢個有機會再講啦。
現實中嘅我係一隻半工讀嘅IT狗乸，朝就肯定九嘅，晚就一定唔止五，有時仲要返大學上堂，已經冇乜時間俾我寫文，所以求各位大大高抬貴手，原諒小女子更文更得慢。
到依家仲堅持寫文嘅原因都係呢六個字：係愛啊哈利！
好啦入返正題，《關於我所傾慕的女子》係我第一篇用明晞呢個身份寫嘅短篇小說。我開始用明晞呢個身份喺Medium寫文嗰陣，正值係啱啱開始我嘅半工讀生涯嘅時候，老實講嗰陣我嘅心理狀態唔係咁好，覺得自己每日重重覆覆庸庸碌碌，覺得呢種生活好冇意義。人生苦短，仲要強逼自己生活喺一個框架裏面，實在唔痛快。所以我決定重新執筆，做返自己想做嘅事，講返自己想講嘅嘢。
當然我唔想閉門造車，寫完篇文出嚟當然想有人欣賞，但應該放喺邊個平台好呢？Facebook？No way… 依家嘅Facebook已經非常之商業化，唔俾錢？你唔洗旨意有人會睇到你嘅post。Instagram？唔係唔得嘅，但我唔認為Instagram嘅定位係俾人寫文睇文囉。喺我煩惱緊到底將我啲文章放喺咩平台度嗰陣，有人向我推介Medium。
我開返部手提電腦，望返我之前專裝文章嘅folder 一望，發現我有篇小說叫《關於我所傾慕的女子》仲未寫完。個故事喺我腦海裏面已經成型，唔寫埋佢實在可惜，於是我就決定完成埋佢。
真係講咗好多廢話，快快趣趣講返篇文先：《關於我所傾慕的女子》對我嚟講，甚至對大部份嘅讀者嚟講，都可能係一塊鏡。望一望自己依家嘅人生，同兩位主角所經歷嘅嘢，係咪有啲似呢？
林韻茵——隨波逐流
我地嘅大女主角林韻茵，曾經有夢想，有愛過嘅人，但佢最後選擇一個佢唔鍾意嘅學科，一個佢唔鍾意嘅丈夫。講到尾，都係因為家人嘅壓力，社會嘅目光逼使佢做啲違心嘅事。
我地出生嗰一刻開始，周圍嘅人好似已經幫你安排好你應該要行嘅路，讀書要讀啲有前途嘅科，打工要打份賺好多錢嘅工，結婚要嫁個收入穩定嘅男人，生仔要逼個仔去學東學西，每一個人都好似用餅模壓出嚟嘅曲奇，失去咗自己嘅型態。唔讀書就係冇用，唔打工就係蛀米蟲，唔結婚就係剩女，唔生仔就係性無能（喂你亂噏啲乜）。只要你唔按照其他人嘅路行，你就係異類，呢種心態導致喺香港街道行走嘅人個個變成行屍走肉。
香港嘅女仔就更甚，社會對中年未婚嘅女士有各種標籤：「剩女」、「賣剩䉀」、「籮底橙」⋯⋯好似女人唔結婚嘅話就唔係女人咁樣，令到好多女仔為咗快快嫁個如意郎君，而忽略咗自己嘅真心，個男仔有錢、有樓、有車就得㗎啦，性格係點？同自己有冇共同興趣？理鬼得咁多咩有筍盤就嫁啦！三十歲前嫁得出先係最重要！
我地比古時嘅人幸福得多，我地有選擇伴侶嘅權利，而唔係父母之命、盲婚啞嫁。但當我地擁有呢種權利嘅時候，我地都冇去選擇一個同自己意氣相投、真心相愛嘅人。結果，我地同古代嘅人比，好似唔係進步得好多。
林韻茵就好似好多香港女仔嘅寫照，讀書時期可能有過一段難忘嘅初戀，但呢段初戀多數唔維持到最後，最後同佢走入教堂嘅，未必係佢鍾意嘅人，但一定係個package好好嘅成功男士。造就嘅香港有咁多個「林韻茵」嘅原因除咗係社會嘅錯，亦有部份係因為自身嘅軟弱。
郭貫中——愛為何物
呢篇小說係用郭貫中做第一人稱寫嘅，透過郭貫中嘅視角去描寫一個佢鍾意咗好耐嘅女仔。除此之外，你亦都會見到郭貫中對學校、社會有好多抱怨。佢覺得學校、社會每一個人都係一式一樣，所以佢好討厭呢個社會，呢個世界，甚至佢都會有小小討厭自己，因為佢自己都係其中一隻甘於隨波逐流嘅機器人。
郭貫中對社會有好多怨言，但好多時候佢都只係敢怒不敢言。佢討厭其他學生毫無目標但佢自己都冇夢想冇目標，佢怨恨林韻茵揀工商管理放棄演奏家夢想，但佢自己都係隨意揀個有前途有錢賺嘅學科就算數。其實郭貫中同我地亦都非常之似——得個講字。好多人都話要有夢想要有大志，但屈服嘅人永遠都比實行嘅人多好多。
當一具行屍走肉嘅郭貫中遇上一個勇於逆流而上，追求夢想嘅林韻茵，林韻茵就成為咗佢嘅心靈寄托，希望林韻茵能夠代替佢做到啲佢想做但係佢做唔到嘅嘢。所以林韻茵放棄夢想嗰陣，佢比林韻茵更加失望更加憤怒。
小說最後一句「 其實，我真的是喜歡她嗎？」，除咗係小說嘅完結，亦都係我想各位讀者回答嘅問題。郭貫中一直傾慕林韻茵演奏嘅身影，但呢種傾慕，到底算唔算得上係愛。我地愛上一個人嘅時候，起初一定會係俾對方某啲特質吸引住先會愛上佢，但當對方失去咗嗰樣特質，你仲會唔會愛？因為對方變咗而唔愛對方，咁一開始嗰種感覺到底係咪真實嘅呢？「愛」呢個課題實在太深奧，我自己睇返篇小說我都揾唔到答案。或者每個人對郭貫中嘅所謂傾慕都有唔同嘅解釋。
其實我仲有好多嘢想講嘅但係乜都攤開曬嚟講就唔好玩啦，每個人對文章有唔同解讀。所以你地對呢小說有咩睇法，都歡迎你地response下。多謝咁多位讀者啦！我都係乖乖地返去做隻資訊有用嘅IT狗先，汪！
