#ملكش_حجة

إزاى تبدأ تذاكر اونلاين


مؤخرا ناس كتير بقت بتتكلم عن موضوع التعليم عالإنترنت ، ودى مش حاجة غريبة من مصر مع وجود عوامل زى التعليم السئ للغاية. موقع كورسيرا طلع إحصائيات مؤخرا إن نسبة كبيرة من زواره (حوالى 30% على ما أذكر) من الدول النامية ودة منطقى جدا ، أكيد اللى بيتعلم كويس مش هيبقى محتاج حاجة زيادة. ما علينا…

الحقيقة أنا عاجبنى جدا الشغل اللى الناس بتعمله والوعى اللى بيحاولو يكونوه عند الناس حوالين الموضوع ، ولفت إنتباهى البوست الشهير اللى فيه بيجمعلك حوالى 40 موقع عليهم كل أنواع الكورسات اللى تتخيلها واللى ماتتخيلهاش ، رغم إن أنا عارف إن الناس هدفها خير وإنها تديك كل الفرص الممكنة ، إلا إنى شايف إن لما بدى حد لسة ميعرفش حاجة عن الموضوع 40 موقع ، أكيد هيحس إن الموضوع كبير وصعب وغالبا مش هيدخل.

أنا علاقتى بالمواقع دى بدأت بكورسيرا ، من ساعة ما سمعت عنه وأنا علاقتى بيه إنى بفتحه كل فترة ، بشوف كورسات كتير أوى نفسى أحضرها ، أضيفها لقائمة التمنى (الويش ليست) ، يجيلى الميل إن الكورس هيبدأ ، أخش أسجل عالكورس ، وما أفتحوش تانى! ليه؟ استهبال بعيد عنك.

المهم أنا هحاول أشرح الموضوع ببساطة وإزاى تبتدى.

مواقع الكورسات اللى عالنت نوعين ، في مواقع بتقدملك كورسات الجامعات ، دى اللى بيديها دكتور في الجامعة غالبا بيدرس نفس الكورس لطلاب الجامعة وقرر يعمل منه نسخة أونلاين. الكورسات دى بتتميز بالطابع الأكاديمى شوية مبعنى إنه مش هيعلمك الحاجة ، ولكن هيعلمك العلم اللى وراها ، وإنت شغلتك إنك لو عجبك الموضوع تبحث فيه أكتر وتجرب وتحضر كورسات متقدمة أكتر. لو إنت من محبى العلم أو الأكاديميا أو بتحب تغوص في الحاجة وتكون معرفة عامة أنصحك بالنوع دة (المواقع هنقولها بعدين)

النوع التانى بقى مش كورسات جامعات ، وإنما كورسات ناس عادية بيكون عندهم خبرة في مجال ما فا بيقرر يعمل فيه كورس عالنت ، النوع دة بيديك الحاجة من الآخر ولو إنت عايز تدرس عشان تشتغل أو عشان حاجة في الشغل أو مشروع عايز تعمله أو كدة ، أنصحك بالنوع دة من الكورسات لأنك أول ما هتخلصه هتكون جاهز مباشرة إنك تستعمل اللى إنت إتعلمته. عيبه إنه بيعلمك حاجة واحدة فممكن يزنقك في خط واحد مش زى الكورسات الجامعية اللى بتديك أكتر من سكة بعد الكورس.

على سبيل المثال ، لو أنا عايز أتعلم تسويق ، ممكن أخد الكورس بتاع جامعة بينسيلفينيا على كورسيرا وأفهم التسويق من أوله وأنواعه وبعد الكورس أشوف أنا هتخصص في إيه ، أو ممكن أخد الكورس بتاع جارى فينرتشاك (برنس التسويق الإلكترونى) اللى على سكيل شير وأبقى متخصص في التسويق الإلكترونى مباشرة.

طبعا في استثنائات ، ممكن تلاقى كورسات على كورسيرا اكاديمية وبتعلمك حاجة واحدة (برمجة أندرويد) والعكس ، ممكن تلاقى كورس بيتكلم عن التسويق عموما على يوديمى.

حددت النوع؟ حدد الكورسات.

خد جولة في موقعين 3 ، وشوف الكورسات اللى عجبتك وسجل فيها (ماتسجلش في أكتر من 3 كورسات عشان ماتحسش بالإحباط) ، وإبتدى إسمع المحاضرات في كل واحد فيهم ، اللى يعجبك أكتر كمل فيه ، لو ال3 معجبوكش سيبهم وسجل في غيرهم ، وهكذا وهكذا لحد ما تاخد فكرة عن كل حاجة وتقدر تقرر أنهى كورس إنت هتكمل فيه للآخر. معلومة عالهامش: 2.5% بس من اللى بيسجلو في كورس أونلاين بيكملوه للآخر. لست وحدك.

أنا مثلا سجلت في 12432141324 كورس وسيبتهم ، لكن لما جيت أبدأ بجد قلت أنا هدور على أقصر كورس وأحضره للآخر عشان أحس إنى أنجزت حاجة ، وكنت بقلب في كورسيرا لقيت كورس عن تحليل البيانات (داتا أناليسيز) والموضوع دة حاليا سخن في المجال التقنى وكله بيتكلم عنه فقلت حلو ، منها أفهم دة إيه وأهو كورس قصير والواحد هيخلصه بسرعة وينجز. بدأت أول أسبوع في الكورس (حماس الشباب وكدة) وسلمت أول واجب والدنيا زى الفل.

تانى أسبوع حصلى ظرف وفوتت معاد الواجب ، جالى حالة إحباط رهيب وقلت خلاص هسيبه زى غيره ، بفتح الموقع صدفة إكتشفت إنك ليك 5 أيام تأخير خلال الكورس (يعنى لو فوتت واجب مسلمتوش ممكن تسلمه بحد أقصى 5 أيام خلال الكورس كله ، ماعدا الواجبات اللى بيصححها الناس اللى معاك في الكورس دى مافهاش تأخير لأنها بتبقى بمواعيد ثابتة). استعملت يوم من أيام التأخير بتوعى وكتبت الكود وسلمته وعديت تانى أسبوع!

تالت أسبوع بقى قلت خلاص فات كتير ما فاضل إلا القليل ، ورغم إنى مكنتش نايم وحالتى متدهورة والأسايمنت كان صعب إلا إنى دخلت نمت وظبطت المنبه وصحيت كتبت الكود والحمد لله اشتغل وسلمته ووالله وعملوها الرجالة.

رابع أسبوع والأخير دة كان بمبدأ فاضلك زلطة وتطلع برة ، قرصت على نفسى جامد وسلمت الأسايمنت والحمد لله خلصت الكورس وجبت 80%. حلو جدا بالنسبة لأول مرة!.

تانى كورس حضرته كان 6 أسابيع كان عن الجيميفيكيشن (إزاى تقلب أي حاجة للعبة عشان الناس ماتحسش بالملل ، زى كدة لما بديك نقط كل ما تستعمل فورسكوير أو كل ما تجاوب على أسئلة في كورا أو ستاك أوفرفلو). الكورس دة كان قمة في المتعة والراجل كان غريب وأنا كنت في قمة الإستمتاع وأنا بتفرج وخلصت الكورس وجبت فيه 95%.

تالت كورس بقى هو كورس الماشين ليرننج بتاع أندرو إن جى. أندرو دة أحد مؤسسين كورسيرا وهو دكتور في جامعة ستانفورد ومن الناس التقيلة اوى ، الكورس بتاعه كان مكتوب إنه 6 أسابيع قلت أدخله ، بعد ما دخلت قالو لمؤاخذة دى كانت غلطة الكورس 12 أسبوع ، قلت مااااااشى. بدأت أول أسبوع ، التانى ، التالت … لحد السادس وكله تمام ، بعد كدة دخل في الشبكات العصبية (النيورال نتوركس). بصراحة مافهمتش اوى ولقيت نفسى بكتب كود شغال وبيحل المسائل صح بس أنا مش فاهم هو إزاى بيحلها صح ، حسيت إنى قلبت مبرمج فقررت أسيب الكورس وأحاول أرجعله تانى ، ربنا يسهل وأعرف أبتديه تانى وأخلصه.

نسيت أقول إن موقع كورسيرا مؤخرا عمل حاجة إسمها التخصصات ودى عبارة عن طريقة عشان تتخصص في مجال معين ، أنا مثلا عايز أتعلم عن تحليل البيانات فكنت محدد كورسات هاخدها ورا بعض ، كوريسيرا ريحك وحدد لو عايز تتخصص في تحليل البيانات إضرب الكورسات دى ، لو عايز تتعلم أندرويد إضرب دول..وهكذا.

حاجة تانية بتساعدك إنك تخلص إنك تحدد معاد معين للمذاكرة ، وتحجزه عالكالندار لو إنت بتمشى بيها ، ولو حد قالك نتقابل في المعاد دة قول له مش فاضى ، أنا مثلا كنت عامل يوم السبت للمذاكرة. بقفل موبايلى وفيسبوكى وكل حاجة لحد ما أخلص وأسلم اللى ورايا. بعد كدة اعمل اللى إنت عايزه.

ماتتفرجش عالفيديوهات بس ، طبق وسلم الحاجات اللى بتطلب في الكورس. الراجل كونفوشيوس قال:

“ أسمعُ و أنسيَ ، أريَ و أتذكرَ ، أفعلُ و أنا أفهمّ “ — كونفوشيوس

عشان تفهم لازم تفعل.

عشان بقى نلخص الكلام دة كله

حدد إنت عايز تتعلم إيه ، وعايزه من منطلق أكاديمى (من الشمخ الجوانى) ولا عايز التطبيق على طول.

حدد إيه الكورسات اللى عاجباك وسجل فيها واسمع وشوف اللى يعجبك.

ابتدى بكورس قصير وخلصه للآخر عشان تحس بالإنجاز.

حدد معاد ثابت للمذاكرة واحجزه في مواعيدك (لو أبوك قالك عايزك قول له مش فاضى لو أمك سيب اللى في إيدك على طول :-) )

إفعل لتفهم.

أهم 3 مواقع للكورسات الأكاديمية (من وجهة نظرى)

https://www.coursera.org/

https://www.edx.org/

http://ocw.mit.edu/index.htm

أهم 3 مواقع للكورسات الى مش أكاديمية (من وجهة نظرى بردو)

https://www.udemy.com

https://www.udacity.com

http://www.skillshare.com/

هدية: دة موقع عامله صديق مصري ، ودة بيجمعلك كل الكورسات من كل المواقع (جوجل التعليم الأونلاين) ، فلو عايز تبحث عن كورس معين أو تتعلم حاجة معينة ، ابحث عليه وهو هيساعدك وهيقولك إنت محتاج تاخد أنهى كورسات من أنهى مواقع. جربوه وإهروه فيد باك http://www.skillacademy.com/

هدية 2: دة موقع تم إطلاقه فى الأردن ، بيترجم الكورسات العالمية ويعيد تدريسها بالعربى (إدراك) وبردو فى موقع رواق وهو موقع عربى يدرس عليه أساتذة أكاديميين عرب

في الآخر الموضوع سهل محتاج بس شوية إجتهاد وتركيز وصبر ومثابرة ، وربنا يوفق الجميع. #ملكش_حجة