中國同日本一齊出事,香港人還是誠實的。
Sep 7, 2018 · 2 min read

中國同日本接近同時受水災影響,結果網上嘅人一面倒關心日本災情。中國?除咗100毛抽過一次習近平水之外,真係冇人提。好多人開口埋口愛國,自己係中國人,高鐵起好真係好高興,但而家就話驚自己去日本班機取消,或者喺大阪搵緊返嚟嘅方法。
口講就愛國,事實就係日本嘢乜都好過中國,視日本係第一旅遊地點,班中坑又用行動證明依件事。
香港人好勢利,為咗利益出賣香港嘅人實在太多,由為蛇齋餅糭投建制嘅老而不到靠大白象沉降工程貪唔少嘅「社會精英」,大家都用香港前途去做自己賭本,只不過大家奶中國鞋底都係因為有著數,而唔係真心愛國。中國水災死人唔係問題,不過日本水浸?機場停用?廿三條立法香港人會忍,政府再無能香港人會忍,鬼佬當香港係公廁集散地香港人都會忍,不過阻住香港人遊日就絕對係死罪。
中國用短期利益去拉攏人心,但日本就用實力去折服世人。對於一個只係識講錢嘅國家嚟講,想有人同你講心真係笑話。試問吓仲有邊個地方嘅高官同有錢人會咁渴求送子女離開自己國家?連政府權貴都咁冇信心嘅地方,精甩尾嘅香港人係咪仲要衝去送死?
日本災害再大,佢總會好快企返起身,政府亦會幫助災民儘快過返正常生活;中國水災過後,我諗只要唔係重點城鎮,政府只係會扔小小錢比地方官員搞掂佢,然後比啲官再貪足九成。
要我愛中國?我搵唔到理由。
FACEBOOK:https://www.facebook.com/MOYINDAY
TUMBLR:http://moyinday.tumblr.com/
Fanpiece:http://women.fanpiece.com/moyinday/
Medium:https://medium.com/@moyinday
