【打工仔必備】強積金整合懶人包
以前一見到 MPF 公司寄嚟嘅信就覺得煩，通常睇都唔睇就擺埋一邊，積晒係度成疊廢紙咁，覺得啲錢反正都攞唔到出嚟是_但啦。後來轉多幾次工，份份工都用唔同MPF，單係「個人帳戶」(內文會解釋)就有4個，上年開始覺得頂唔順，望過下有關MPF整合嘅資料，發現真係麻煩到一個點，又要填實體form又剩……最後又不了了之。依家諗返轉頭，如果一早識處理就唔使積埋咁多個戶口，又要收咁多冇用嘅信。最緊要係，萬一將來永久離港想「提早提取強積金」都唔使分咁多次搞吖嘛！
近排因為轉咗工，所以又收到一封關於上一份MPF嘅信，叫我「處理累算權益」，如果我係信件發出三個月都冇任何指示，嗰間MPF公司就會自動幫我將啲錢由「供款帳戶」轉去一個「個人帳戶」。我諗唔係人人都知原來有分唔同帳戶，所以簡單解釋吓：
強積金制度下設有三類強積金帳戶
分別為供款帳戶、個人帳戶及可扣稅自願性供款帳戶。
a) 供款帳戶：滾存在現職期間的強積金，每個供款期的新供款會存入此帳戶
b) 個人帳戶：滾存在過去受僱或/及自僱期間所累積的強積金，及/或滾存「僱員自選安排」從現職供款帳戶轉入的強積金
c) 可扣稅自願性供款帳戶：滾存的可扣稅自願性供款，及從其他可扣稅自願性供款帳戶轉移至該帳戶的強積金
通常打工仔只要返過多過一份工，從來冇搞過強積金，都會有至少一個「個人帳戶」同「供款帳戶」。
邊啲帳戶可以整合？
首先，連續受僱60日以上就需要供MPF，咁當你由A工轉去B工時，A工嘅「供款帳戶」就唔會再有新供款，同時B工做夠60日就會開始供新一份MPF，會有一個屬於B工嘅「供款帳戶」。而A工嘅「供款帳戶」就需要處理，好似我開頭提到，一般情況如果你唔理會的話，A工嗰間MPF公司會自動將筆MPF由「供款帳戶」轉去「個人帳戶」，筆錢繼續保留喺嗰間MPF公司「投資」，直到你記起(處理)佢。
由於香港有超過10間MPF公司(即「強積金受託人」)，當你轉多幾次工之後，遺留3–4個MPF「個人帳戶」都係平常事，而基本上需要整合嘅就係呢堆一直冇郁嘅「個人帳戶」，同埋上一份工嘅「供款帳戶」(適用於轉工3個月內)。重點：一般情況整合「個人帳戶」&整合「供款帳戶」係要分開申請！咁啱我轉個間MPF公司online application可以填一次資料就做晒兩種帳戶整合，唔使分兩鑊，所以建議可以的話都online搞(唔係間間得，之後會講)。
