Q1, 申請VISA搞左幾耐？
我係2018年2月26日左右日子申請，4月20日收到通知批左，但我個VISA 4月21日就生效，當初冇預佢要搞2個月咁耐，亦都唔知會連帶影響申請PN既野。話說，我本身係1月1日就諗住搞架啦，點知填填下FORM發現佢要我提供保險同寫MAXIMUM 1000 CHARACTERS 既申請原因，拖延癌末期既我一拖就拖左兩個月。不過，最近聽其他WH港人講先知，原來申請原因寫一句就得(簡直浪費人生⋯⋯)，保險可以後補，但唔係一開始就比埋的話，有機會拖慢申請進度。
Q2, 到底要帶幾多錢先夠？
好啦，其實就係數學題，每個人荷包深度唔同，備用基金可多可少，或者你可以問下自己，萬一短時間搵唔到野做點打算？我個人覺得保守估計，至少要有準備3個月食谷糉都頂得住既資金，我當你就算唔開飯，都要交屋租。以月租5000SEK計算，3個月租加1個月按金，都已經20000SEK，如果真係只帶MINIMUM 15000SEK的話，除左恭喜之外我都唔知可以講咩好。就算比你2個月後搵到工(其實即係我既case)，最快都要2個月先出到第一次糧(仲要講緊你個銀行戶口已經READY)，即係你7月開始返工，7月既糧會係8月25日先出，中間近2個月既時間，分分鐘可以食風。由此推算，20000SEK交租用，再衰衰地10000SEK3個月生活費，我建議都係預夠30000蚊港紙(突然變返HKD係咪好貼心？)
Q3, 你有冇Personal Number？
當知道對方都係黎WH，問下有冇PN同問人食左飯未其實係差唔多意思既開場白(好似係)，而我本人係冇PN所以亦唔係有野要炫耀，我逗留瑞典唔夠365日，所以申請唔到PN都係正常既結果，近期發現唔少2018年下半年黎到，又好醒有做足功課既朋友都係申請到PN，希望大家唔好對申請PN呢件事太過憂慮，亦唔好比2018年8月一篇關於瑞典WH既新聞(亦都係唯一一篇)嚇窒，呢度已經有個冇PN得CN但生勾勾死唔去既人辦。
延伸閱讀：瑞典工作假期疑惑：沒有personal number不能工作？
Q4, 冇PN有乜影響？
冇PN冇福利，但稅就交一樣咁多！第一件事係千祈唔好病！冇錢真係連病既資格都冇，如果你冇PN又唔係EU PASSPORT HOLDER仲要不幸病左嚴重到一定要去見醫生，我又要恭喜你啦，見一見醫生盛惠1600–1800SEK(重點係大部分既保險都唔會claim得足，我睇返我份保險門診每次只係包800HKD，如果有人知有保險包足既麻煩開心SHARE！！！！！)，而且藥係另計，麻煩你揸住PRESCRIPTION去藥房買藥啦，冇醫生紙連買枝消炎既眼藥水都買唔到呀。有PN就幸福啦，睇次醫生都係唔知200定250SEK姐，差幾多倍我已經唔想計了。 第二件事，冇PN就用唔到MOBILE BANK ID，冇BANK ID就用唔到SWISH(瑞典PAYME)，冇SWISH有時真係覺得比人ISOLATE左，連夾返錢比香港人朋友佢地都話唔收CASH(你地唔好咁啦！CASH真係錢黎架用得架sosad)(p.s.冇MOBILE BANK ID其實仲可以扯到去報稅既問題，但呢件事暫時未發生，當得個知字啦) (小請求：如果有寫過銀行OR SWISH既友PAGE唔介意提供LINK可以SHARE資訊，畢竟我冇用過真係作唔出) 第三件事，冇得上政府提供既免費語言班，不過呢個都唔算好大獲，因為有香港人話其實RED CROSS都有得免費學SWEDISH，有興趣自己SEARCH下啦。 其他我暫時諗唔到啦，就算有都唔算太影響我生活，太影響既我應該會好記得，呀仲有一樣既，有PN可以上網登記你張SL卡(交通卡)，如果唔見左都可以CUT卡REISSUE。
Q5, 點樣搵屋？
關於點樣搵屋其實我都寫過架喇，普遍都係上網搵架姐，但瑞典其實有法例規定唔係間間屋都可以合法出租，我估我租個度都未必係合法，不過是但啦由頭到尾都住得好地地，算係咁。我係包羅萬有既買賣平台blocket.se度搵到呢個租盤既，雖然同唔少人講我地度要5000SEK一個月覺得好貴，但我住市中心(T-central站隔4個站)兼地鐵站上蓋，直到依家我都未聽過有人長租搵到比我更市中心既地段(自豪)，當然我明白有人一場黎到係想享受大自然遠離煩囂，但到你日日都要由屯門去觀塘返工，係咪又準備好繼續每日受地鐵(親切既MTR)瀨屎之苦呢？
延伸閱讀：瑞典工作假期攻略：斯德哥爾摩搵屋篇
下集由點樣搵工開始講起！
更多在斯德哥爾摩的故事：fb.me/natsurvivingdiary
