最詳盡香港學神學車及打電話搶重考生快期經驗分享
(非會員可按此繼續閱讀)
報名
發覺學車由報名個刻開始，真係有好多錢要洗，而且手續都幾煩！因為冇諗住經駕駛學院報名，所以search都冇search過，以下淨係講「私家車及輕型貨車」自己搵師傅既approach。
搞學牌同約筆試
根據政府難睇到冇人想睇既「教學」，係要成功申領學習駕駛執照(學牌)後，再預約參加駕駛考試，運輸署教學個圖表就冇咁1999，兩樣野suppose係一齊申請。不過學牌有效期係12個月，而你要到真係學車個刻先需要個牌，依家等得考筆試同排期路試，分分鐘已經係第一次去運輸署既大半年之後，一個唔好彩一take pass唔到，排期重考好易遲過學牌個有效期，到時唔止要再比考試費，又要洗多筆錢續學牌，真心唔抵，所以可以淨係申請駕駛考試先！不過唯一麻煩係要再嘥時間去運輸署搞，首先一定要去現場申請(可代辦)，其次佢淨係開星期一至五，約筆試仲只可以去運輸署香港牌照事務處(ie.金鐘)或九龍牌照事務處(ie.深水埗)辦理，建議去運輸署前可以預約左先，方便社畜安排時間。
— Form及申請費：a)駕駛考試[TD82] $510；b)學習駕駛執照[TD555]$548
所需文件：身分證、3個月內住址證明正本或副本(銀行月結單、水電煤/電訊商繳費單或可接納的地址證明列表)
個人經驗：最後我係臨開始學車前先去申請學牌，搵師傅上堂前佢都會提你要攞學牌先，不過記得唔好比個牌師傅keep住，冇呢個必要架。
考試
‧筆試及排期路試
一般筆試會安排係星期二至四舉行，考期係報名一個月之後，但撞正疫情，2021年4月中去報，筆試日期係7月中(今日睇駕駛考試輪候時間，筆試排到8月頭，平均輪候時間86日)。筆試係考20條交通選擇題，係20分鐘內答啱16條或以上就合格。網上有好多免費模擬試題任做，呢樣我就唔免費幫人賣廣告，只係想提大家唔好淨係用一個app。到時如果pass左筆試，運輸署會即場抽試場同時間比你，預返考試前2-3個月去搵師傅學車就得。係5月出文之時，輕型貨車(合併試)排期已經排到12月，平均輪候時間係209日。
