民主派在立法會內務委員會拉布，令內會無法選出新一屆主席，內會亦無法處理其他積壓的工作，驚動港澳辦和中聯辦罕有一齊炮轟主持會議的郭榮鏗，林鄭同親中派見老細出聲亦立即附和，難得有次皇帝急過太監。此時可引發幾點聯想。
首先，兩辦聲明說「在此非常時刻，作爲民意代表的立法會議員，本應急市民之所急，以大局爲重，履行應盡職責，與特區政府和社會各界齊心協力、共克時艱。但是一些反對派議員爲了謀取政治私利，卻罔顧公衆利益，采用卑劣手法癱瘓立法機關運作，這種行爲無異於『政治攬炒』。其所作所爲令人質疑有違有關宣誓誓言，構成公職人員行爲失當。」
兩辦指責民主派拉布就是罔顧公衆利益，沒有做好議員工作，行為失當，就值得DQ，這涉及何謂議員工作的問題。我從段落理解，似乎他們認為「與特區政府...齊心協力」就是議員工作。那是否即是不跟政府齊心協力就是罔顧公衆利益，沒有做好議員工作，行為失當，DQ得？那今次就拉布，會否下次就投票反對政府都係行爲失當，再遲吓出聲鬧政府都係行爲失當，全部DQ得？只有做舉手機器同人肉錄音機，政府講乜做乜都支持同「齊心協力」，先有得留低？
其次，兩辦指6個月來選不出內會主席癱瘓立法會運作，令抗疫乜乜乜都受阻。但過去6個月，政府施政除了送中條例，有邊樣受阻？財政預算案有受阻嗎？警察同林鄭加薪有受阻嗎？全民派一萬有受阻嗎？抗疫措施、救市措施有受阻嗎？有冇傳說中的財政懸崖、政府停頓、世界末日、failed state？鐵證如山係，乜事都冇，就算政府fail都係自招，搶米搶廁紙搶口罩係因為政府廢，唔係咩內會選唔到主席。請大家搞返清依樣。
第三，點解親中派長期唔出聲？因為成件事係佢地自己一手造成，多得李慧琼子做左翻版梁耀忠。郭榮鏗主持會議，因為佢係上屆副主席。點解唔係上屆主席？因為上屆主席係琼子，而佢角逐連任，有利益衝突要避席，根本佢唔角逐連任就會係由佢主持會議，輪唔到郭榮鏗。咁你話係咪難怪琼子一路潛水唔敢見家翁？
第四，今次睇到兩辦經過早輪改組後，行動更一致，亦會更加插手香港事務，以後有排黎。當然，咁係違反基本法22條「中央人民政府所屬各部門、各省、自治區、直轄市均不得干預香港特別行政區根據本法自行管理的事務」，不過中共違反基本法都唔係今日的事了。講起22條，兩辦近日仲猛講23條，可能下次反對23條又話係公職人員行爲失當DQ得啦。
第五，今次係恐嚇民主派議員，兼恐嚇埋市民，唔好諗咩民主35+、議會抗爭、議會攬炒，其他評論員都有講了。但我認為當連兩辦都公開提起攬炒一詞，更加證明佢地係重視依件事，驚佢發生。大家千祈唔好被嚇到。出解放軍都講左N次，出未？真係35+，中共會做乜，真係到時先知，但千祈唔好被嚇到，唔敢去做。佢出句聲咋你就咁快放棄的話你就真係輸了。
最後，如果真係DQ，民主派都誓必會司法覆核，到時個波就丟去法官度了。依家評論太多就又被人話干預法治，但都希望法律界諗諗，依家係咪兩辦又係度間接釋法，要法律界接受議員反對政府都係唔盡忠職守、行為失當、DQ得？如果法官真係咁判，係咪過度干預立法會運作、亦都係更向中共低頭，以後中聯辦發個聲明就全部要跟？其實由一開始，我都覺得有冇得做議員應該係由選民決定。依頭你郁吓就DQ議員，果頭又叫市民唔好粗暴、相信制度、循制度改變、用手上選票云云，成邏輯嗎？如果咁做，唔好怪更多人認為法官反民主、法治已死。又返返去納粹德國興起果段文，市民有事時你唔保護市民，就唔好怪第日你有事時市民唔保護你。
